1-майдиз, Гатфарин ва зегьметдин суварин юкъуз, Ахцегь райондин Фиярин хуьре сувариз хас шад гьалара Фий вацIалай тухванвай кIвачи-кIвачи фидай муьгъ ачухна.
Аквар гьаларай, и югъ хкягъун дуьшуьшдин кар тушир. Мярекат кьиле тухузвайда къейд авурвал, муьгъ хуьруьн жемятдини райондин кьиле авайбуру гъиле кьунвай кар кьилиз акъудун патал вири къуватар сад авуна кIвалахунин нетижа я.
И вакъиа фиявийри йисаралди гуьзлемишнай. Фиярин хуьр, гатун са куьруь вахт квачиз, дуьньядихъай михьиз гел атIанвай чка тир лагьайтIа, жеда. Гила и хуьруьн агьалийривай, йисан гьи вахтунда хьайитIани, къунши хуьрериз ва райцентрадиз физ жеда. 109 метрдин яргъивал алай муьгъ эцигунин патахъай хуьруьн активдин патай атай теклифдин тереф муниципалитетдин кьили ва депутатри тамамдаказ хвена. Такьатар райондин бюджетдай чара авуна ва муьгъ са куьруь вахтунда эцигна куьтягьна.
Чкадин агьалияр патал акьалтIай еке важиблувал авай и мярекатда Ахцегь райондин кьил Абдул-Керим Палчаева, республикадин маса районрай, хуьрерай атай мугьманри, депутатри ва чкадин агьалийри иштиракна.
Мярекат тухунив тешкилатчияр (райондин культурадин управление) жавабдарвилелди, рикIин сидкьидалди эгечIна. ИкI, муьгъ дагъвийрин къадим девирдилай авай гуьзел адетдалди ачухна. Муькъвел къвезвай мугьманар, халкьдин манийралди ва авазралди, вичел жаван гада алай балкIандин кьенерар са гъиливди кьуна, хуьруьн агъсакъал Шуюф Забутович Аллагьярова къаршиламишзавай. Дагъвийриз хас тирвал, кавал ва лацу бапIах алай Абдул-Керим Палчаева лагьайтIа, яру лент туруналди кьатIна, суварин шадвилер башламишна.
Райондин кьилелай гъейри, мярекатдал Фиярин хуьруьн агьалиярни, кьилди къачуртIа, хуьруьн кавха Мансур Мамедалиев, СВО-дин иштиракчи Магьир Рамазанов, агъсакъал Булух Умудалиев, райсобранидин депутат Леонард Атлуев, жемиятдин крарал машгъул Гуьлогълан Мамедяров рахана.
И юкъуз мярекатда бахтлу инсанар, манияр, макьамар, кьуьлер, дагъвийрин мугьманпересвал ва дадлу тIуьнар гзаф тир. Райондин музыкадин коллективарни, масанрай теклифнавай артистарни, яратмишунрин дестеярни майдандиз экъечIна. Хуьруьнвийриз гзаф чими алхишар авуна ва тебрикдин келимаяр лагьана. Амма виридалайни чими, рикIин сидкьидай тир баркалладин гафар фиявийри «Капстрой» ООО-дин коллективдиз, райондин кьилиз ва и карда куьмек гайи вирибуруз лагьана.
«Чухсагъул Абдул-Керим Нажмудиновичаз, адан коллективдиз, адан дестедиз — абур гайи гаф хуьдай инсанар я! Чаз аквазва абуру райондин мулкар къайдадиз хкун патал гьикьван кIвалахар ийизватIа. Райондин акунар дегиш хьанва. Къе лагьайтIа, куьне чаз вичел гьатта къимет эцигиз тежедай кьван багьа савкьат авунва — чахъ садрани тахьай хьтин муьгъ багъишна. Гила чун жуван хайи хуьруьз маса гуьгьуьлралди гьахьзава», — сесиник зурзун кваз лагьана агъсакъал Шуюф Аллагьярова.
Дугъриданни, адан гафарал рази тахьана жедач. Халкьди гузвай къимет виридалайни гьахълуди ва дуьзди я. Ахцегь районда хъсан патахъ кьиле физвай дегишвилер, гьакъикъатдани, виле акьадайбур я. И жигьетдай Дагъустандин халкьдин шаир Хуьруьгъ Тагьиран гафар рикIел хквезва: «Чи макандиз вуж атайтIани, лугьуда: Ахцегьар — им Женнетдин пIипI я!»
Амина Муслимова
