Гъалибвилин сувар Россиядин гьар региондин, шегьердин, хуьруьн агьалияр патал пакди, гьамиша вил алайди, шаддаказ, тешкиллувилелди кьиле тухузвайди я. ГьикI лагьайтIа, Ватандин ЧIехи дяведа советрин уьлкведин 27 миллиондилай виниз инсанар телеф хьана. Гъалибвилин метлеб лап зурбади я. Советрин Союзди, Яру Армияди немсеринни фашистрин чапхунчияр неинки атайвал чпин магъарадиз хъфиниз мажбурна, гьакI алемни фашизмдин тIегъуьндикай азадна.
Суваррин мярекатра, яшарилай аслу тушиз, гъвечIи-чIехи вирида иштиракзава. Гъилевай йисуз уьлкведин халкьари Гъалибвилин сувар 79-сеферда къаршиламишзава. Республикадин шегьерра, хуьрера тухвай мярекатарни гзаф я.
Республикадин меркездикай рахайтIа, жегьилри, волонтерри сифте нубатда Махачкъалада авай аскеррин сурар къайдадиз гъана, мулк михьна, къванер асун хъувуна.
Тарихдин музейда тешкилай Гъалибвилин диктант кхьинин мярекатда гзафбуру иштиракна.
Чи республикада Ватандин ЧIехи дяведин цIуд иштиракчи ама. Жемиятдин тешкилатри, жегьилри, шегьердин администрацияди ветеранрин кIвалерин вилик, гьаятра куьлуь парадар тешкилна, манияр лагьана, пишкешар гана, ветеранрин гуьгьуьл къачуна.
Уьлкведа кьуд йисуз «Рекьин тийидай полкунин» гьерекат тухваначир. «Россиядин рекьин тийир полк» ООД-дин региондин штабдин регьбер Виктория Гьажиевади къейд авурвал, цIини, хатасузвилин месэла себеб яз, ам гегьеншдиз тухун тийидайвал хьана. Амма «Рекьин тийир полк» серенжемдин маса жуьреяр жагъурна. Гъалибвал къазанмишуник чпин пай кутур чIехи бубайрин, имийрин, багърийрин шикилар гьаятра эцигна, цларал алкIурна, школайра, аялрин бахчайра шикилар гваз акцияр тешкилна. Соцсетрикайни менфят къачуна. Гзафбуру чпин багъри бубадин, ветерандин шикилдихъ галаз ягъай суьретар (селфи) интернетда эцигна.
Вири школайра важиблу месэладикай — Ватандин ЧIехи дяведин нетижайрикай, Гъалибвал къазанмишай Яру Армиядин аскеррикай рахунар, суьгьбетар кьиле фена.
Дагъустан Республикадин жегьилрин крарин рекьяй министр Камил Саидова лагьайвал, и жуьредин мярекатар вири шегьерра ва районра тешкилна.
9-Майдиз Каспийск шегьерда Гъалибвилин суварин парад кьиле фида. Ана республикадин гьукумдин, военный, къайдаяр хуьдай органрин, жемиятдин, жегьилрин, динрин тешкилатрин векилри иштиракда.
Абад Азадов
