Докъузпара райондин администрацияда 6-августдиз райондин кьили нубатдин гьафтедин совещание кьиле тухвана. Совещанидин кlвалахда райондин кьилин заместителри, советникри, хуьрерин кьилери, идарайринни тешкилатрин жавабдар къуллугъчийри ва масабуру иштиракна.

Совещание райондин кьил Абдурагьим Алискерова ачухна ва иштиракчияр йикъан месэлайрихъ галаз танишарна.

З-кварталдин налогрин гьакъиндай райондин экономикадин отделдин начальник Султанмурад Магьмудова ихтилатна. Кьилди къачуртlа, ада райондин вири хуьрера налогар кlватlунин гьалар гьихьтинбур ятlа рекъемралди къалурна, алай вахтунда санлай районда кlватlнавай налогрин кьадар ва и жигьетдай вилик кумай месэлаярни къейдна.

Малум хьайивал, райондин сергьятра официальный регистрация авачиз кlвалахзавайбур учетда эцигунин кlвалахни давамарзава.

Райондин образованидин управленидин начальник Гъвейибег Шагьвеледова ва райондин кьилин заместитель Салигь Гьажимурадова мектебар цlийи кlелунин йисаз гьазур хьунин месэла гьихьтин гьалда аватlа ихтилатна. Абуру къейд авурвал, мектебра талукь тир ремонтрин кlвалахар давам жезва. Райондин кьили ремонт авуниз герек тир такьатар вири мектебрив агакьарун хиве кьуна.

Совещанидал Къурушрин хуьруьн мулкара, Ярудагъдин ценерив инвестиционный майдан эцигунин кlвалахар гатlуннавайдакайни малумарна. Къейд авун герек я, тlвар кьунвай мулкара гележегда альпинистрин лагерь кардик акатда.

«Лезги газет»