Мукьвара Ахцегь райондин Къурукаларин хуьре футболдай сифте сеферда яз турнир кьиле фена. Вич Къурукаларин хуьряй тир алакьунар авай футболист, алай вахтунда Брянск шегьердин “Спутник” клубда гьужумчи яз къугъвазвай Мегьамед Алишеван призар къачун патал тешкилай турнирда са шумуд командади иштиракна.
Къугъунрин нетижада 1-чка “Женни”, 2-чка “Арсенал” ва 3-чка “Къужах” командайри кьуна. Турнирдин нетижада лап хъсан гьужумчи виридалайни жегьил Къадир Эльдаровакай хьана.
Къугъунрин иштиракчийриз пишкешар гудалди вилик Ханлар Алишева вири иштиракчияр тебрикна, абуруз спортда агалкьунар алхишна. Ада алава хъувурвал, алакьунар авай жегьилриз куьмек гуз ам гьамиша гьазур я. Жегьил футболистрин гуьгьуьлар ачух жедай гафар Ахцегь хуьруьн администрациядин кьил Низами Эфендиевани лагьана. Мумкинвилериз килигна, ада футболдин майдан авайдалай хъсан хъувун хиве кьуна. ТIвар-ван авай футболист Мегьамед Алишеваз ва турнирдин иштиракчийриз алхишдин келимаяр “Ахцагь” футболдин командадин тренер Камил Гьажиева, муаллим Нурудин Багъирова, Ахцегь райондин жегьилрин комитетдин векил Айвар Насирова, спортдин мярекатрин тешкилатчи Нурудин Дагъларова ва Къурукаларин школадин директор Гьайдар Эльдарова лагьана.
Гуьгъуьнлай агалкьунар хьайи командайриз кубокар ва къиметлу савкьатар гана.
Футболдай вичин ватанда турнир кьиле тухунин макьсаддикай хабар кьурла, Мегьамед Алишева заз ихьтин ихтилатна: “Заз хъсандиз чизва хьи, жегьилар спортдал желбунихъ, абуруз чпин алакьунар къалурдай мумкинвал гунихъ еке метлеб ава. И турнирдин макьсадни жегьилриз мумкинвал гун я. Аял чIавуз заз спортдин жигьетдай зи халу, муаллим Тофик Максимова куьмекар гана. Футбол къугъваз эгечIай вахтара халуди заз гьамиша куьмек гуз, ашкъи кутаз хьана. Ам вич спортдал гзаф рикI алай инсан я. Гьеле 9-классда авайла ада заз Ставрополдин командада къугъун теклифна. Са тIимил къалабулух акатнатIани, за жуьрэтлувал къалурна. Пакадин юкъуз зун тренер Камил Гьажиевахъ галаз Ставрополдиз рекье гьатна… Къурукаларин хуьре футболдин сад лагьай турнир тухуник зи тренердин пайни ква. Акъажунра судья яз иштиракай Рамидин Гьажимурадоваз, рикIел аламукьдай шикилар ягъай Юсиф Саркароваз ва спортдин и мярекатда иштиракай вирибуруз за чухсагъул лугьузва”.
Ада алава хъувурвал, Къурукаларин хуьре футболдин турнир гьар йисуз кьиле тухуда.
Куругъли Ферзалиев
