— Кьил тIазвайла, хуьрекдин са тIуруна авай куьлуь авунвай валерьянкадин дувулрал са стакан къайи яд илична, 6-8 сятда тада. Ахпа ам куьзна, йикъа пуд сеферда, хуьрекдин са тIуруна авайди, хъвада.
— Мадни кьил тIазвайла, инидин 20 тварцел 250 мл яд илична, 10 декьикьада ругуна, 5 декьикьада тада. Ахпа ам куьзна, ичIи рикIелай хъвада.
— Кьил мукьвал-мукьвал элкъвезвайла, куьлуь авунвай 2-3 чичIекдал са стакан къайи яд илична, 12 сятда тада. Ахпа ам куьзна, йикъа пуд сеферда, хуьрекдин са тIуруна авайди, хъвада.
— Гьар экуьнахъ фу недалди вилик са стаканда авай кузвай яд, куьлуь-куьлуь хупIар ийиз, хъвайитIа, хук хъсан михьи жеда ва бедендин сагъламвилизни екез хийир гуда.
— Зигьин хъсанарун ва кьилин гиживал алатун патал кьурурнавай жикIияр куьлуь авуна, зур литрдин банка ацIурда ва винелай аниз стакандин 3 паюникай кьве паюна авай эрекь илична, гьар юкъуз юзуриз, 2 гьафтеда мичIи чкада хуьда. Ахпа ам куьзна, шекердин кIусунал 20 стIал вегьена ишлемишда.
— Ксудалди вилик чIутран цуькверин (ромашка) чай хъвайитIа, йифиз хъсан ахвар къведа. Ам икI гьазурда: аптекадай маса гузвай хуьрекдин са тIуруна авай чIутран цуькверал 1 л ргазвай яд илична, 15 декьикьада тада. Ихьтин чайди ратарин кIвалахни хъсанарда.
Гьазурайди — Надият Велиева
