Инсандин кьисмет, адан уьмуьр Аллагьдин гъиле ава лугьуда. Инсан кечмиш хьайила, руьгь цаварал хъфизватIани, адан беден Эхиратдин кIвализ рекье хтун мукьвабурун буржи я. Заз лезги халкьдин лап еке дережадив агакьай, уьлкведин сагьибри чпин зегьметдиз зурба къимет гайи инсанрикай ихтилатиз кIанзава.
Ери-бине Ахцегь райондай тир Алискеров Гьажимирзе нафтIадин буругърин устIар, регьбер хьанай. Ам кечмиш хьайидалай кьулухъ диде маса гъуьлуьз хъфейла, абурун хцин 7 йис тир. Алискеров Азиз Гьажимирзеевичав тахай бубади чIехи кIелунар ийиз тунай, адакай Советрин Союздин геолог, алим хьанай. Ам 42 йиса авайла Чукоткадин Билибинский районда кечмиш хьана ва ана кучукнава. Ина са поселокдиз Алискерован тIварни ганва.
Ам кучукнавай чка интернетдай асантдиз жагъида. Бубадин гуьгъуьналлаз адан хва Азизакайни машгьур геолог, алим хьана. Ада Камчаткада кIвалахна, адакай чкадин губернатордин советникни хьанай. Кечмиш хьайила, адан веси яз, бедендин руьхъ Камчаткадин Авачинский заливдин Халатинский пляждин патав цериз чукIурнай. Чидач, хизан авайни, авачирни. Азиз Азизовича вичин рикIин сир 2016-йисан 6-февралдиз а заливдин цериз багъишнай.
Камчаткада Ахцегь райондин Калукрин хуьруьн жемятдин векилри зегьмет чIугвазва, Чукоткада къизилдин мяденра кьурагьвийри кIвалахзава. Жечни абурувай Алискерован тIварцIиз садра кьванни са дуьа кIелиз, я туш хьи, — Ахцегьрин мискIинда. Къариблухда къайи цел вегьей са капунал алай Азиз Азизовичан руьхъ заз тек хьанвай са чайкадиз элкъвейди хьиз хьана…
Бикеханум Алибегова
