КIвалериз чимивал гудай 2023-2024-йисарин сезондин нетижайралди, РД-дин Госжилинспекциядиз 3403 арза атана, гьа жергедай яз 2866 арза коммунальный къуллугъар ерисуздаказ тамамарунихъ ва я абур гьич тахьунихъ галаз алакъалу тир. Кьилди къачуртIа, 644 агьалиди кIвалера чимивал тахьунилай, 489 касди — электричестводалди ва 148 касди газдалди таъмин тахьунилай арзаяр авуна. Инспекцияди кьабулнавай серенжемар себеб яз, 316 касди чпин арзаяр кьулухъ элкъуьр хъувуна.
Идакай ислен юкъуз «Дагъустан» РИА-дин майдандал кьиле фейи пресс-конференциядал Дагъустандин Госжилинспекциядин кьил Сергей Касьянова хабар гана. Гуьруьш чимивал гудай сезондин нетижайриз талукьди тир. РикIел хкин, 2023-2024-йисарин гзаф квартирайрикай ибарат кIвалериз чимивал гудай сезон 17-ноябрдилай башламишнай.
Агьалийрилай виридалайни гзаф кьадар арзаяр, малум хьайивал, Махачкъаладай атанва (1918), адан гуьгъуьна Каспийск (476), Дербент (104) ва Хасавюрт (94) ава. Идарадин регьберди хабар гайивал, гьар са арзадиз талукь яз ахтармишунар кьиле тухванва.
«Чимивал гудай сезондин вахтунда вилик акъваззавай четин месэлайрикай лагьайтIа, гьелбетда, гьам пландин бинедаллаз, гьамни бейхабардаказ электричество хкудун сифте чкадал ала. И месэладин четинвал ам я хьи, эквер хкатайла кIвалера чимивал гудай тадаракрин кIвалахни акъваз жезва», — къейдна инспекторди.
Малум хьайивал, 2023-2024-йисарин чимивал гудай сезондин вахтунда республикада ахтармишунин 731 серенжем кьиле тухванва. И кIвалахдин нетижада 1488 документ гьазурнава. ИлитIнавай жермейрин кьадар 6 миллион манатдилай гзаф я.
Ада хабар гайивал, яшайишдинни коммунальный къуллугърай бине авачиз гьакъи гьисабнавай агьалийрин гьахъ-гьисабар (11 миллион манат) цIийи кьилелай хъувунва.
Сергей Касьянова хабар гайивал, алай йисан январдилай апрелдалди газдин тадаракар законлу бине авачиз сетрихъ галкIурай дуьшуьшар винел акъудун патал 33 агъзурдалай гзаф кIвалер (гзаф квартирайрикай ибаратбур) ахтармишнава, нетижада 4300-далай гзаф сертификация тавунвай тадаракар жагъанва. Идалайни гъейри, ахтармишунрин нетижада малум хьайивал, газдин пичер сетдик кутун патал жиринин шлангар ишлемишнавай дуьшуьшарни са кьадар авай. И нукьсан чкадал аламаз арадай акъудзавай.
РикIел хкин, 2023-йисан 1-сентябрдилай кIвалерин ва квартирайрин къене авай газдин тадаракар технический рекьяй ахтармишуниз талукь къанундик кухтунвай дегишвилер къуватда гьатнава. ИкI, гила газдин тадаракриз къуллугъ ва ремонт авунин везифаяр газ паюнал машгъул тешкилатри (ГРО) тамамарда.
2024-йисан 15-апрелдин делилралди, ГРО-рихъ галаз 333046 икьрар кутIуннава. Им абонентрин санлай къачур кьадардин 54 процент тешкилзавай делил я.
22-апрелдин делилралди, кIвалериз, дараматриз чимивал гудай сезон республикадин вири муниципалитетра акьалтIарнава ва идара ийидай, гьакIни чимивилелди таъминардай компанийри алукьзавай 2024- 2025-йисан сезондиз гьазурвал акваз башламишзава.
Жасмина Саидова
