Туристри итиж ийизвай объектрин кьадардал гьалтайла, Дагъустан Россиядин регионрин арада кIвенкIвечи яз хкянава. Идакай РФ-дин министррин кабинетдин сайтди хабар гузва. 2022-йисалай башламишна республикада туристри фикир желбзавай 40-далай гзаф объектар жагъанва. Къейд ийин хьи, туристри итиж ийизвай объектрин жигьетдай вилик жергейра гьакIни Новосибирскдин, Сахалиндин ва Челябинскдин областар ава. Санлай къачурла, Росреестрди 2022-йисалай уьмуьрдиз кечирмишзавай «Туристар патал чил» проектда 669 участок ва мулк майдандиз акъуднава.
РД-дин туризмдин ва халкьдин художественный сеняткарвилерай министерстводи хабар гузвайвал, майдин суваррин вахтунда республикадиз 110 агъзур кас туристар атун мумкин я. Алатай йисан и вахтунда атай туристрин кьадардив гекъигайла, и рекъем 20 процентдин винизди я. Алатай йисан майдин вацран эвел кьиляй жезвай яргъалбур тир ял ядай йикъара Дагъустандиз 90 агъзурдалай гзаф сиягьатчияр мугьман хьанай.
Мугьманханаяр, ял ядай базаяр ва маса чкаяр майдин сифте йикъара тахминан 50-60 процентдин ацIун гуьзлемишзава. Гатун варцар патал чIехи пай мугьманханаяр виликамаз саки вири кьунва.
Жасмина Саидова
