Зи таяр-туьшер, гьихьтин девирда яшамиш, чIехи хьанатIа ва вилериз вуч акунатIа, гьа крарин шагьидар я. Чи бубайри чпин уьмуьрда анжах са фахъ кIвалахна, дуьньядин ругудай са пай хьайи СССР хьтин зурба уьлкве арадал гъана.
Гьайиф хьи, СССР яргъалди амукьнач, чукIурна. Вучиз икI хьана лагьайтIа, къайдадик квай СССР, гьукуматдин кьилиз Сталиналай кьисас вахчур, халкь такIан Хрущев ва ахпа Горбачев, Ельцин, Яковлев, Шеварднадзе хьтин хаинар атайла, пайгардикай хкатна. Хрущев чи халкьдин сад лагьай душман я. Вучиз лагьайтIа, ада Сталин хьтин камалэгьли, акьуллу, вичин нефс вилик кутун тавур, кесиб халкьдин къайгъудар хьайи, вири сад хьиз кьур зурба кас пислемишна.
1936-йисан Конституция дегишарначиртIа, Горбачеваз, Ельциназ, Шеварднадзедиз, Яковлеваз ва масабуруз партиядин членвал аквадачир. Абуру США-диз рей гана.
Алемда ислягьвилин даях тир СССР чкIайдалай кьулухъ дуьньядин гьар са пипIе цIай, ялав гьатна, язава, рекьизва, къакъудзава. Килиг, Израилди Палестинада вуч ийизватIа. Са тахсирни квачир, гьеле пIузаррал дидедин некIедин гел аламай, кьепIина авай аяларни кваз телефзава.
Чун шагьидар я, 1967-йисуз Израилдиз, гьа гила хьиз, Палестина кукIвариз кIан хьанай, амма СССР-ди и кар ийиз туначир.
Чи уьлкведин гьар са агьалиди, тарихдин вакъиайриз дуьз къимет гана, садвал мягькемарна кIанда. Чи девлетар патанбурув тарашиз туна кIандач. Чун датIана уяхвал хуьниз мажбур я. СССР хьиз, Россияни чукIуриз алахънавай душманар гзаф я. Украина гъилик авуна, кьиле Америка аваз, исятда чахъ галаз 50 гьукуматди дяве тухузва, гуя чпи Украина хуьзвайди я лугьуз. Туш, абуруз Россия чпиз табий хьана кIанзава. И крариз фикир гана, чун вири сад хьана, США кьиле авай РагъакIидай патан ампаяр магълуб жедайвал авуна кIанзава. Путин властдин кьиле амай кьван абурувай чпин фикирар кьилиз тухуз жедач. Чна патанбурув чакай ягьанатар ийиз вугун тийин. Чун сад хьайитIа, садан тIемни чак акакьдач.
Шихали Багъиров
