Дагъустанда СтIал Сулейманан 155 йис тамам хьунин сергьятра аваз кьиле тухузвай асул кIвалахрикай сад Махачкъалада, кьве бульварни са багъ сад хъувуна, «XX асирдин Гомеран» тIварцIихъ галай чIехи парк арадал гъун я. И макьсадриз, санлай къачурла, 357 миллион манат пул акъатда.
Эцигунрин, ремонтдин кIвалахар мергьяматлувилин «Купол Надежды» фондунин такьатрихъ тешкилдайвал я. Идакай республикадин меркездин администрациядин кьилин сад лагьай заместитель Нариман Темуркаева хабар гана.
«Шегьердин мулкарал алай, агьалийри ял ядай пуд чка сад хъувуна, Дагъустандин халкьдин шаир СтIал Сулейманан тIварцIихъ галай парк арадал гъунин теклиф региондин Кьил Сергей Меликова гана. Ихьтин къарар республикадин гьукумди «XX асирдин Гомер» дидедиз хьайидалай инихъ 155 йис тамам хьунихъ галаз алакъалу яз кьабулна», — лагьана ада.
Н.Темуркаеван гафаралди, кIвалахар кьве патал пайнава. Сад лагьай пай майдин юкьвара акьалтIарун фикирда кьунва. ЦIийи паркунин мулкара авай тротуаррин къванер тамамдиз дегишда, йифиз экв гузвай тадаракар цIийи хъийида, фонтан эцигда ва са жерге маса крар къайдадиз гъида.
Алай вахтунда ина куьгьне тарар атIузва, махсус кIалубдин материалрикай туькIуьрнавай жугъун чукIурзава. ЦIийиз эцигдай жугъун винел патан акунрай куьгьнедаз ухшарди жеда, анжах ам маса материалрикай гьазурда.
КIвалахрин кьвед лагьай пай алай йисан сентябрдин вацра акьалтIарда. Икьван чIавалди цIийи паркунин мулкара 300 тарни 250 агъзурдав агакьна цуьквер цада, мумкинвилер сергьятламиш хьанвай агьалияр патал бязи шартIар арадал гъида, паркуна са жерге объектар эцигда, кардик кутада.
Къейд ийин хьи, СтIал Сулейманан тIварцIихъ галай паркунин мулкар, аваррин театр алай чкадилай гатIунна, къумукьрин театрдин дараматдив агакьдалди давам жеда. Ада виликан шегьердин багъ, Родопдин бульвар ва «XX асирдин Гомеран» тIварцIихъ галай сквер сад ийида.
Агьмед Магьмудов
