3-мартдиз Ахцегь райондин при­зывдин комиссиядин гегьенш заседание хьана. Райондин кьил, призывдин комиссиядин председатель Абдул-Ке­рим Палчаеван регьбервилик кваз кьиле тухвай адан кIва­лах­да Ахцегь, Докъузпара ва Рутул районрин военный комиссар, подполковник Рафик Мегьамедова, МВД-дин «Ахтынский» отделдин начальник, под­­полковник Эльдар Ибрагьимова, СП-рин кьилерини жегьилар армиядиз тухунин рекьяй военный учётрин столрин­ пешекарри, райондин идарайринни карханайрин кьилери, мис­кIинрин имамри ва СМИ-дин векилри иштиракна.

Абдул-Керим Палчаева къейд авурвал, РФ-дин Президент,  ­Верховный главнокомандующий В. В. Путинан Указдалди гатфарин призыв уьлкведа 1-апрелдилай кьиле физва. Зулухъни гатфарихъ кьиле тухузвай и важиблу кар, гьелбетда, СВО-дихъ галаз алакъалу туш. 18-29 йисан яшара авай сагълам жегьилриз са йисан муддатда ар­миядин жергейриз эверзава. Абуру дяведин махсус серенжемда  иштиракдач. Ахцегь райондай исятда 60 кас Россиядин яракьлу къуватрин жергейриз рекье туна кIанзава.

РВК-дин комиссар Рафик Мегьамедова залда авайбур призывдин кампания кьиле тухунин къайдайрин бязи цIийивилерикай хабардарна. ИкI, гила кьабулиз тежедай себеб авачиз, «повестка» кваз такьуна, военкоматдиз татай жегьилдал 30 агъзур манатдив агакьна жерме илитIза­ва. Комиссарди гьакI СП-рин кьи­леризни общественный тешки­латриз жемятдин арада призывдин гьакъиндай гъавурдик кутунин кIвалах активламишуниз эвер гана.

Веревирдзавай месэладай рай­администрациядин кьилин ва призывдин комиссиядин председателдин заместитель Роберт Гьамзаев, Эльдар Ибрагьимов ва маса юлдашар рахана. Абуру СП-рин кьилерал жемятдин арада призывдин гьакъиндай гъавурдик кутунин кIвалах гегьеншарун, рухсатдиз хтанвай СВО-дин иштиракчийрихъ галаз гуьруьшар тешкилун тапшурмишна.

Абдул-Керим Палчаева алава хъувурвал, «СВО-дин шартIара жегьилар, контрактникар яз, дяведин къуллугъдал желбунин важиблу карни рикIелай алудна виже къведач. Ватан хуьн итимдин эвелимжи ва пак буржи, баркаллу кIвалах я».

Дашдемир  Шерифаллиев