20-апрелдиз СтIал Сулейманан райондин администрациядин куьмекдалди «Лезги газетдин» редакцияди, мергьяматлувилин «ЛЕКИ» фондуни ва ФЛНКА-ди Эминхуьруьн юкьван мектебда лезги чIалайни эдебиятдай чIехи олимпиада кьиле тухуда.
ЦIи кьуд лагьай сеферда тешкилзавай и мярекат СтIал Сулейманан 155 йисан юбилейдиз талукьарнава.
Олимпиада 10-классра кIелзавай аялрин арада кьиле тухузва ва гьар са мектебдай дидед чIалай «акъажунра» анжах са аялдивай иштиракиз жеда. Гъалибчияр патал алай йисуз 15 чка тайинарнава. Абуруз 30 агъзурдалай 5 агъзурдал кьван (чкайрилай аслу яз) пулдин пишкешар, дипломар ва ктабар гуда. Пулдин пишкешризни дипломриз кIвенкIвечи чкаяр кьур аялрин муаллимарни лайихлу жеда.
Мярекат сятдин 10-даз гатIунда, нетижаярни жюриди (председатель — «Лезги газетдин» кьилин редактордин заместитель Куругъли Ферзалиев) гьа юкъуз кьада. Вири иштиракчияр патал мектебда нисинин тIуьн тешкилдайвал я.
«Лезги газет»
