Зун и йикъара СтIал Сулейманан районда кардик квай аялрин худо­жест­веный школадиз фена. Анин дегьлизрин, кабинетрин цларал алай стендар, преподавателри­ ва аялри гьар жуьре рангаралди­ чIу­гунвай инсанрин суьретар, тIеби­ат­дин  гуьзел ва тарихдин метлеб­ авай чкайрин шикилар, парчадал­ гъаларалди ва кIарасдал кана атIан­вай нехишар акуна.

— Суьретар ва шикилар чIугунин искусство гьамиша инсандихъ галаз­ санал ала, — чи гьейранвал акурла­, лагьана школадин директор Бажи­халум Мирзалиевна Меликовади. — Лап дегь девиррилай инсанри чпин фикирар, гьиссер рагарал­, чархарал шикилар чIугуналди къалурзавай. А шикилрай чаз инсандин тарих аквазва.

Директордин кабинет­диз фейила, чи фикир цла­кай куьрсарнавай ва столрал алай дипломрини грамотайри чпел желбна. Шаксуз, абуру школа­дин преподавателрин ва аялрин алакьунринни агалкьунрин патахъай ачухдиз шагьидвал ийизва.

Чаз малум хьайивал, Бажихалум Мирзалиевна пешедай, кIвалахдай руьгьдин таъминвал жагъанвай жегьил пешекар я. ЦIийихуьруьн юкьван школада кIелдай йисара дагъви рушан рикI шикилар чIугунал алай. Вири тарсарин арада изобразительный искусстводи кьетIен чка кьунвай. Гележегдин пешени гьим хкядатIа, артух фикирар авун лазим атанач:­ 1991-йисуз Бажихалум Жемалан тIва­­­рунихъ галай Дагъустандин худо­жественный училищедин «рос­пись ткани» отделенидик экечIна. Сту­дент тир йисара ада вичин алакьунар са шумуд выставкада къалурна.

Б.Меликовади вичин зегьметдин рехъ 1996-йисуз райондин худо­жест­венный школада преподавателвиле кIвалах авунилай башламишна­.

Кьадар-кьисметди Бажихалум Мир­­залиевна Санкт-Петербургдиз акъудна. Ина яшамиш жезвайла, кIва­лахдилай къецяй компьютерный графикадин курсарни акьалтIарна.

Ватандиз хтай 2021-йисуз ада райондин художественный школада преподавателвиле кIвалах авун давамарна. 2022-йисалай школадин директорвиле кIвалахзава.

Гьа са вахтунда, Б.Меликовади вичин чирвилерин ва пешекарвилин дережа хкажуникайни фикирзава. И мураддалди ада, кIвалахдивай къерех тахьана, Новочеркасскдин культурадинни образованидин университетдин Дербентдин филиалда кIелзава.

КIвалахдин хъсан тежриба авай преподавателар тир Нариман Мазанова, Лариса Рамазановади, Абдулвагьаб Рамазанова, Эмина Къаинбеговади ва масабуру аялриз искусстводин сирер чирунилай гъейри, чпини районда ва республикада кьиле тухузвай выставкайра иштиракзава, кIвенкIвечи чкаяр кьазва.

— Чи художественный школадихъ Кьасумхуьрел, ЦIийихуьре, Герейханован хуьре, Вини СтIалдал ва Курхуьрел (ам мукьвара ачухнавайди я) школайра филиалар кардик ква, — лугьузва Б.Меликовади. — Школада 160-далай виниз аялри­ шикилар­ чIугунай, кIарасдал нехишар атIунай, парчадал гъаларалди нехишар авунай ва искусстводин маса хилерай вердишвилер къачузва, чпин устадвал хкажзава.

Школада искусстводин­ сирер чирай са шумуд жегьилдикай гуьгъуьнлай хъсан художникар, пеше­карар хьанва, абурукай­ Нариман Мазанова­ ва Эль­мира Наврузо­ва­ди художественно-гра­­фичес­кий ин­ститут­ ва Избербашдин педучилище акьал­тIар­на, и школада преподавателар яз кIва­лахзава.

Школадин преподава­телри ва аялри районда ва республикада тухузвай гьар жуьредин мярекатра иштиракзава, абуруз талукьарнавай са шумуд выставка художественный школада ва райондин культурадин имаратда кардик ква.

— Тариф авун туш, чи школа рес­публикадин художественный школайрин арада хъсанбурукай сад я, — лугьузва Б.Меликовади. — И кар чи преподавателриз, аялриз, школадин коллективдиз ганвай дипломрай, гра­­мотайрай аквазва.

Директордин гафарин гьахълувал къалурун яз, чаз са шумуд мисал гъиз кIанзава. Алатай йисуз Да­­гъустандин халкьдин шаир Расул Гьамзатован 100 йисан юбилейдиз та­­лукьарна тухвай «Гамза­товские странички» республикадин­ выставка­да санлай школа ва 6 преподавател­динни аялрин кIвала­хар Дагъус­тан­дин культурадин министерстводин кIе­лунинни мето­ди­кадин центрадин директор К.Эль­даровадин къул алай дипломриз, «Вместе против терроризма» рес­публикадин выставкада школа дип­ломдиз лайихлу хьана.

ЦIийи йисан вилик Махачкъалада «Праздник к нам приходит» лишандик кваз республикадин нинийрин выставка кьиле фена. Анани школади диплом къачуна.

А.Тахо-Годидин тIварунихъ галай Дагъустандин педагогикадин ах­тармишунрин институтдин 80 йис ­та­мам хьуниз талукьарна тухвай «Ху­дожник-педагог» республикадин выс­тавкада иштиракунай школадин директор Бажихалум Меликова ва преподаватель Нариман Мазанов сертификатриз лайихлу хьана. Ихьтин мисалар мадни гъиз жеда.

Алай вахтунда школади маса выставкайра иштиракун давамарунихъ галаз санал СтIал Сулейманан 155 йис тамам хьуниз талукьарна, Сулейманан суьретрин ва яратмишунрин бинедаллаз шикилар чIугу­нин выставкайриз гьазурвилер аквазва. Выставкайра гьам преподавателрин, гьамни аялрин кIвалахар къалурда.

Хазран  Кьасумов