Уьлкведа 1-апрелдилай гатфарин призывдив эгечIнава. Россиядин Федерациядин Президент Владимир Путинан къарардалди ам 15-июлдалди давам жеда. Санлай къачурла, и гатфариз Россиядин армиядиз 18-йисалай 30 йисалди яшар хьанвай 150 агъзур касдиз эвер гуда.
Республикадин военкоматдин пресс-къуллугъди хабар гайивал, Яракьлу Къуватрин частариз Дагъустандай жегьилрин сифтегьан дестеяр 15-апрелдилай рекье твада. РФ-дин Яракьлу Къуватрин Генштабдин управленидин начальник Владимир Цимлянскийди малумарайвал, армияда къуллугъ ийиз эвер гузвай жегьилрикай садни Россиядин цIийи регионриз — ДНР-диз, ЛНР-диз ва Херсондинни Запорожьедин областриз ракъурдач. Къейд авун лазим я хьи, жегьилри армияда, гьа виликдай хьиз, 12 вацра (са йисуз) къуллугъда.
Призывдиз талукь закондик кухтур дегишвилер себеб яз, гила Россиядин армиядиз сад лагьай сеферда 18-йисалай 30 йисалди яшда авай гадайриз эвер гузва. Виликдай 27 йисалай виниз алатнавай жегьилар армиядиз желбзавачир. Закондик кухтунвай дегишвилер мад ава. ИкI, армиядиз фидай яшарив агакьнавайбурув электронный повесткаяр вугузва. Абур, «Госкъуллугъар» парталдикай ва я МФЦ-дикай менфят къачуна, призывникар яшамиш жезвай кIвалерин адресриз рекье твазва. Гьелбетда, и къайда гьелелиг виринра ишлемишиз жезвач. Гьавиляй адетдин жуьре (чарчин повестка) кардик кума.
Донбассда кьиле тухузвай махсус серенжем себеб яз, 2023-йисуз армиядикай кьил къакъудзавайбурни хьана. Жуьреба-жуьре ванерихъ-сесерихъ агъуна, диде-бубайри ва гьам жегьилри законсуз гьерекатриз рехъ гана. Уьлкведин Конституцияда къалурнавайвал, гьар са эркек агьалиди армияда къуллугъ авун буржи я. И кардикай кьил къакъудун закон кваз такьун я. Гьавиляй ахьтин ксар жерме ийизва. Повестка вуганвай кас къалурнавай вахтунда военкоматдиз татайтIа, ам 10 агъзурдалай 30 агъзур манатдал къведалди жерме ийизва. Виликдай 500-3000 манатдин жерме ийизвайди тир. Медкомиссиядиз татай жегьилар 15-25 агъзур манатдин жерме ийидайвал я. Бязи жегьилризни абурун диде-бубайриз и кар чир хьана кIанда.
Военный къуллугъдиз эвер гунин месэла Дагъустандин регьберри чпин гуьзчивиликай хкуднавач. И йикъара кьиле фейи мярекатди идан гьакъиндай шагьидвалзава. Сергей Меликова 2023-йисан призыв кьиле тухвай гьалдилай разивална ва гьа са вахтунда республикадин вири военкоматра призывдин серенжемриз хъсандиз гьазур хьана кIанзавайдакай лагьана. Талукь къуллугърал Республикадин сборный пункт и важиблу кампаниядиз гьикI гьазур хьанватIа ахтармишун тапшурмишна.
Дагъустандин военный комиссардин везифаяр вахтуналди тамамарзавай Замирбег Куьребегова мярекатдал малумарайвал, Дагъустандай армиядиз 1994-йисалай 2006-йисалди хайи жегьилар тухуда. Абур, сергьятчийрин кьушунрилай эгечIна, вири жуьрейрин частариз рекье твада.
Хийир Эмиров
