«Лезги газетдин» редак­цияди, машгьур меценат Нари­ман­ Гъазалиеван куьмекдалди, СтIал Сулейманан шиирар кIе­лу­най уьл­кведин дережада аваз, «СтIал Сулейманан ирс» лишандик кваз, онлайн-конкурс кьиле тухузва.

Мярекат Дагъустандин халкь-­дин шаир СтIал Сулейманан 155 йис тамам хьунин сергьятра аваз тешкилнава.

Конкурсда Россиядин жуь­реба-жуьре регионрай 6, 7, 8-классра кIелзавай аялривай иш­тиракиз жеда.

Конкурсдин шартIар:

— лезги чIалалди СтIал Сулейманан “Гьарда вичикай хан ийида” шиир кIелун ва ам, мани, макьам галачиз, видеодиз къачун;

— шиир кIелзавай видео 30-ап­релдалди ватцапдин 8-989­-­­653-42-35 нумрадиз рекье тун;

— ватцапдин нумрадиз гьакI­ни иштиракчидин ФИО, теле­фон­дин нумра, электронный­ поч­­та, иштиракчиди 6, 7, 8-класс­­да кIелзавайди тестикьарзавай мектебдай къачунвай справка рекье тун.

Гъалибчийриз дипломар, кта­бар ва пулдин пишкешар гу­да: 1-чка кьурдаз — 30 агъзур; 2-чка — 25 агъзур; 3-чка — 20 агъзур; 4-чка — 15 агъзур; 5-чка — 10 агъзур.

Савкьатар 18-майдиз СтIал Сулейманан музейда вахкуда.

Суалар пайда хьайитIа, телефондин 8-928-584-16-72 нумрадиз зенг ийиз жеда.

Гьарда вичикай хан ийида

 

Фагьумна за: гьарда вичал

ТIвар эцигна хан ийида;

Акьуллудаз тагуз мажал,

Кьилди са дуван ийида.

Бейхабар яз вич вичикай,

Гъер кIвахьна физ гьакI сивикай,

Гьар ахмакьда са чIарчIикай

Лап яцIу чукьван ийида.

Я канаб течиз, я ипек,

Я дишид чидач, я эркек.

Гьарда вичин руквад кесек

Еке кIеви къван ийида.

Я югъ чидач вичиз, я йиф;

Акьулдикай — пара зайиф.

Я хва кьей кас, на ви тариф,

Бес я, мад гьикьван ийида?

Я вилик чидач, я кьулухъ,

Я гам чидач вичиз, я рух.

Вичин кьве яш ламран къудух

Деведлай кьакьан ийида.

Эй, факъир дели-дивана,

Иер фагьум ая вуна.

СтIал шаир Сулеймана

Азардиз дарман ийида.

«Лезги газет»