СтIал Сулейманан — 155 йис
ЧIехи шаирдикай мад са чи чIехи камалэгьлиди, Агьед Агъаева, садра лагьанай: «СтIал Сулейман Советрин Союздин гьар са пипIе машгьур тир. Ам гьа са тегьерда лезгидиз ва гуржидиз, якутдиз ва белорусдиз, московэгьлидиз ва Балтикадин матросдиз багьа тир. И кардин себеб ашкаради я: Сулейманан шиирри абурун вирибурун руьгьдин истемишунар рази ийизвай…
СтIал Сулейман, А.Безыменскийди хиве кьурвал, «чпикай баркаллувилин манияр туькIуьрна кIандай ва туькIуьрдай шаиррикай сад я». Писатель гьахъ хьана. Шаирдикай Джамбул Джабаева, Янка Купалади, Демьян Бедныйди, Михаил Исаковскийди, Гьамзат ЦIадасади, Хуьруьг Тагьира ва гзаф маса шаирри баркаллувилин чIалар туькIуьрна. Абур кIелайла, Ватандал рикI алай гьар са инсандик дамахдин гьисс акатзава».
ЦIийи девирдани СтIал Сулейман, чи халкьдин дамах яз, вичикай манияр туькIуьрзавайди яз амукьна. Адакай датIана цIийи-цIийи эсерар арадал къвезва. Сагъ асирдин къене чпик вири дуьньядиз машгьур ксарни акатзавай хейлин авторри адаз бахшнавай эсерар санал кIватIнайтIа, чи кIелзавайбур патал ам гьихьтин къиметлу савкьатдиз элкъведайтIа, фикирдиз гъиз жеда. И кар аннамишна, Дагъустандин халкьдин шаир Майрудин Бабаханова «Сулейманаз бахшнава» кIватIал гьазурнава. Шаирди къейдзавайвал, адак уьлкведин эдебиятдин дестекрин эсеррихъ галаз санал гьевескаррин шиирарни акатнава. Гьавиляй ам СтIал Сулейманан машгьурвал, ам халкьариз истеклувал къалурзавай гуьзгуь хьиз кьабулиз жеда. «ЦIийи Кавказ» дестедин программадик кваз гьазурнавай и чIехи ктаб акъудиз СтIал Сулейманан райондин администрацияди куьмек гана. КIелзавайбурун фикирдиз чна «Сулейманаз бахшнава» ктабдай кьве шиир теклифзава. Лезги чIалаз абур Майрудин Бабаханова элкъуьрна.
«Лезги газет»
