И йикъара СтIал Сулейманан районда, СВО-дин игит А.Бабаеван тIварунихъ галай 1-нумрадин ДЮСШ-да, школайра кIелзавай рушарин командайрин арада райондин кIвенкIвечивал патал волейболдай акъажунар кьиле фена.
Райадминистрациядин пресс-къуллугъди хабар гузвайвал, Крым Россиядик ахкатна 10 йис тамам хьуниз бахшнавай шад мярекатда райондин кьилин заместитель Заур Къагьриманова, спортдин, туризмдин ва жегьилрин крарин рекьяй комитетдин директор Чингиз Абдулмежидова иштиракна. Абуру волейболди неинки сагълам уьмуьр кечирмишиз, гьакI сад хьун, сада-садаз куьмек гун, са мураддихъ элкъуьрнавай кар кьилиз акъудун хьтин ерияр тербияламишуниз куьмекзавайди къейдна.
Къизгъиндаказ кьиле фейи къугъунрин нетижада Кьасумхуьруьн 2-нумрадин юкьван школадин команда 1-чкадиз лайихлу хьана. Курхуьруьн ва Алкьвадрин СОШ-рин командайри 2 ва 3-чкаяр кьуна.
Гъалибчи командайриз кубокар, медалар ва грамотаяр гана.
Рагнеда Рамалданова
