22-мартдиз «Альтаир» центрада кьиле фейи Вирироссиядин аялринни жаванрин «Ворошиловский стрелок» фестивалдин республикадин дережадин акъажунра 14 командади иштиракна. Ана Докъузпара райондин хкянавай командади (регьбер — Усугъчай хуьруьн юкьван школадин ОБЖ-дин ва НВП-дин муаллим Сарухан Саруханов) 3-чка кьуна.
Фестиваль итижлудаказ кьиле фена. Ам аялрин рикIел яргъалди аламукьдайдал шак алач. Медениятдин паюниз талукь программадин сергьятра аваз, абур патал ТОКС-дин музейдиз ва «Кванториум» технопаркуниз экскурсия тешкилнавай.
Фестивалдин иштиракчийри, кIвачел акъвазна ва ацукьна, тфенгдай лишан кьунай, гранат гадарунай ва конкурсдин программадай чпин алакьунар къалурна. Санлай командадиз, гьакI аялриз кьилди чпин алакьунар къалурдай мумкинвал авай. ИкI, Усугъчайдин юкьван школада кIелзавай Максим Шагьэмиров ацукьай чкадилай тфенгдай лишан кьунай 1-чкадиз лайихлу хьана.
КIвенкIвечи чкаяр кьур командайриз талукь дережайрин кубокар гана.
Рагнеда Рамалданова
