СтIал Сулейманан — 155 йис
И йикъара Кьасумхуьрел, Дагъустан Республикадин Халкьдин Собранидин депутат Имам Яралиеван регьбервилик кваз, алай йисан майдиз Дагъустандин халкьдин шаир СтIал Сулейман дидедиз хьайидалай инихъ 155 йис тамам хьун къейд авунихъ галаз алакъалу яз, тешкиллувилин комитетдин заседание кьиле фена. Анал тешкиллувилин месэлаяр, мярекатрин план, гьакIни юбилей къейд авунихъ галаз алакъалу са жерге месэлаяр веревирдна. Идакай чаз райадминистрациядин пресс-къуллугъди хабар гана.
Заседание райондин культурадин отделдин начальник Майрудин Бабаханова депутат лишанлу вакъиадин кьилин мярекатрин пландихъ галаз танишарунилай башламишна. ИкI, ада шаирдин юбилейдиз муниципалитетда кьиле тухудай гзаф кьадар конкурсрихъ, выставкайрихъ, гуьруьшрихъ, флэшмобрихъ галаз сад хьиз, СтIал Сулейманаз бахшнавай шииррин ва шаирдин афоризмайрин ктабар, «СтIал Сулейман — шикилра» пишкеш яз гуз жедай гуьрчег ктаб-альбом чапдай акъудун, «СтIал Сулейман — шикилра ва кинохроникада» видеофильм, «Куьредин ярар» литературадин бюллетень гьазурун пландик квайди раижна. Кьилин мярекат лагьайтIа, Агъа СтIалдал, СтIал Сулейманан КIвале-музейда, 18-майдиз кьиле тухуда.
Имам Яралиева, СтIал Сулейманан медениятдин ирс хуьнин важиблувал къейд авунихъ галаз сад хьиз, оргкомитетдин членриз ва вири районэгьлийриз лишанлу вакъиа къейд авуниз талукь мярекатриз гьазурвал акунин ва кьиле тухунин крара активнидаказ иштиракуниз эвер гана. Ада мярекатрин бязи пунктарал кIвалах хъувун патал са жерге теклифар гана, халкьдин шаирдин 155 йисан юбилей виниз тир дережада аваз кьиле тухунихъ ва ам республикадин дережадин вакъиадиз элкъведайдахъ инанмишвал къалурна.
Идалайни гъейри, депутатди Агъа СтIалдал СтIал Сулейманан КIвалихъ-музейдихъ физвай рехъ, патарив гвай чкаярни дуьзарна кIанзавайди, гьакIни шаирдин тIварцIихъ галаз алакъалу тир маса объектар гуьрчегарунин месэлайризни кьилин фикир гун лазим тирди къейдна. Ада гьакIни XX асирдин Гомеран уьмуьрдикай ва яратмишунрикай телефильм арадал гъунин теклифни гана.
Имам Яралиева райондин кьиле авай ксарихъ ва активдихъ галаз гатфарин призывдин кампаниядин, гьакIни Россиядин Яракьлу Къуватрин жергейриз икьрардин бинедаллаз агьалияр кьабулунин месэлаярни веревирдна.
Райадминистрациядин кьилин жемиятдин хатасузвилин рекьяй заместитель Абуталиб Фатулаева хабар гайивал, гатфарин призывдиз пландин бинедаллаз гьазурвал аквазва. Ада къейд авурвал, райондин агьалийри военный къуллугъ хкягъуна чпин активвал къалурзава. ИкI, йисан алатнавай вахтунда райондай 11 касди военный къуллугъдин икьрар кутIуннава. Имни хъсан делил я.
Эхирдай кIватI хьанвайбуру Имам Яралиеваз муниципалитетдин уьмуьрда активнидаказ иштиракунай, мергьяматлувилин серенжемрай, кьилди къачуртIа, «Умуд» фондуни СВО-дин иштиракчийриз куьмекар гунай сагърай лагьана.
Рагнеда Рамалданова
