Тагьиров Мегьамед 1917-йисуз Куьре округдин Кьулан ЗахитIрин хуьре лежбер Ханмегьамедан хизанда дидедиз хьана. Хуьруьн сифтегьан ва Цмуррин ирид йисан школаяр акьалтIарай ада кIелунар Буйнакскда ва Махачкъалада давамарна, адакай кьве пешедин сагьиб хьана. Техникадин ва педагогикадин рекьерай дипломар гвай жегьилди 1938-йисуз вичин зегьметдин рехъ Хив РОВД-да УР-дин отделдин начальниквилелай башламишна.
Ватандин ЧIехи дяве башламиш хьайи 1941-йисуз ам Докъузпара РОВД-дин начальниквиле тайинарна. И акьалтIай четин, хаталу вахтунда ада партиядин ва гьукуматдин буйругъдалди чкадал жавабдар месэла гьялунин, Яру Армиядин жергейриз къуватар желб авунин, фронтдиз, оборонадиз куьмекар гунин ва партизанрин дестеяр тешкилунин кIвалах тешкилна.
1943-йисуз Кьасумхуьруьн районда къанун-къайда мадни пайгардик кутун патал Мегьамед Тагьиров аниз РОВД-дин начальниквиле рекье туна.
Еке бажарагъ, къаш-къамат авай, адалатлу, къагьриман хьтин начальникди инани гьалар хъсанарна. Кьве йисалай ам Табасаран РОВД-дин начальниквиле тайинарна.
Ватан хаталувилик квай вахтунда садбуру чпин чанар къурбандзавайла, хаинар, дяведикай, жемятдин краривай кьил къакъудна, тамарани чуьллера гьатнавай. ЧIуру рекьера авайбуруз гафуналди, кардалди таъсир ийиз алакьдай къуллугъчиди, райондин активистрин куьмекни галаз, са куьруь вахтунда инани къайда туна, чIуру крарал эхир эцигна.
Дяведилай гуьгъуьниз Мегьамед Ханмегьамедовичаз мад гьа и къуллугъдал Кьасумхуьруьн, Докъузпара районра РОВД-риз регьбервал гун кьисмет хьана.
1954-1964-йисара кьвед лагьай сеферда Табасаран РОВД-дин начальник яз кIвалахай ада райондин агьалийрин патай еке гьуьрмет къазанмишна.
Полковникдин чинда аваз, Кьасумхуьруьн РОВД-дин начальниквиле кIвалахзавайла, виридаз истеклу Мегьамед Тагьиров 1966-йисан апрелдиз чавай гьамишалугъ яз къакъатна. Ам масадан дердиникай хабар кьадай, кIеве гьатайдаз куьмек гудай, дирибаш, мерд, вафалу хва тир. Гьукуматди адан лайихлувилериз еке къимет ганва. Ам цIудалай виниз орденрин, медалрин, грамотайрин сагьиб тир.
Рамазан Велибегов,
тарихчи, писатель
