Чи ватанэгьлияр — гьар сана

И йикъара чи редакциядив вичи мукьвара медицинадин илимрин кандидатвилин дережа къачунвай жегьил алимдикай хабар агакьна. Ихтилат Белла Ибадуллаевна Аюбовадикай физва. Ам 1989-йисан 14-ноябрдиз пешекар военный, полковник, женгерин гьерекат­рин ве­­теран (Чечнядин 2 лагьай вакъиай­рин вахтунда къенепатан кьушунрин мах­сус­ полкунин командирвал авуна), Мегьарамдхуьруьн райондин Чахчах-Къаз­майрилай тир Ибадулла Велимегьамедовичан ва Ларият Шихабетовнадин хизанда дидедиз хьана.

Хъсан чирвилер къачунин еке ашкъи, кьетIен кьатIунар хьайивиляй гьа сифте классрилай Беллади мектебда тафаватлу­даказ кIелиз башламишна. Махачкъа­ла­дин 38-нумрадин мектеб къизилдин медалдалди куьтягьайдалай кьулухъ Белла Аюбова И.Кантан тIварцIихъ галай Балти­кадин Федеральный Университетдин­ ме­­­ди­цинадин институтдик экечIна ва 2013-йисуз анаг тафаватлудаказ акьал­тIарна.

2013-2015-йисара Санкт-Петербургда В.А.Алмазован тIварцIихъ галай медицинадин ахтармишунар ийидай милли центрада гематологиядин рекьяй ординатурада кIелна.

Алакьунар авай, пешедал рикI алай духтурди алай вахтунда, гематолог­ яз, Санкт-Петербургдин академик И.П.Пав­лован тIварцIихъ галай медицинадин гос­университетдин 31-нумрадин поликлиникада (ГБУЗ) зегьмет чIугвазва.

ЦIусад йисан тежриба хьанвай Белла духтурдиз кIвалахдин юлдашри, сагъа­рун патал адан патав къвезвай начагъбуру екез гьуьрметзава. Идан гьакъиндай адан патав уьлкведин жуьреба-жуьре шегьеррай физвай начагъ ксари чпиз куьмек хьайидалай кьулухъ интернетдин сайтда чи ватанэгьлидин тIварцIихъ кхьизвай алхишдин келимайри шагьидвалзава. Чаз акуна хьи, адаз анжах разивал, чухса­гъул малумарзава.

Абуру Белла Ибадуллаевна дикъетлу, савадлу, жавабдар, гъавурдик квай пешекар тирди гьейранвилелди кхьизва. «Вичин инанмишвилелди, рикIин сидкьидай куьмек гуз кIан хьуналди, духтурди чун саки кьиникьикай хвена», — кхьенва са дишегьлиди Б.Аюбовадикай.

Чи девир вири хилера цIийивилер, дегишвилер, еримлувилер арадал къвезвайди я. Гьар са хиле кIвалахзавай пешекарарни аямдин истемишунрин гъавурда авай савадлубур хьун чарасуз я. Ихьтин месэлаяр аннамишзавай, илимдал машгъул жедай къаст авай Белла духтур, ординатурада чирвилер артухарунал акъваз тавуна, «Таргетная терапия рецидивирую­щих и рефрактерных форм острого миелоидного лейкоза у взрослых» темадай медицинадин илимрин кандидат­вилин диссертация кхьинив эгечIна. Чаз малум хьайивал, адан диссертациядин кIвалах ва автореферат алатай йисан эхирра академик И.П.Павлован тIвар­цIихъ галай Санкт-Петербургдин медици­надин сад лагьай госуниверситетдин сайтда чапна.

2024-йисан 12-февралдиз алимрин советдин заседанийрин залда агалкьунралди диссертация хуьналди, Белла Ибадуллаевнади лезги алимрин кьадар артухарна.

Къейд ийин, Белладин хайи вах Гуьлселем Аюбовади РФ-дин СК-дин РД-да авай СУ-да къуллугъзава, ам юстициядин полковник я. Стха Арсен Аюбов РФ-дин ФТС-дин (Федеральный таможнядин къуллугъ) РД-да авай къуллугъдин офицер я.

Илимдин, кIвалахдин рекье чаз Белла Ибадуллаевнадихъ мадни еке агалкьунар хьана кIанзава.

К.Ферзалиев