Дагъустандин мелиорациядин хиле, 2023-йисан нетижайралди, 27 проект уьмуьрдиз кечирмишнава, хабар гузва РД-дин хуьруьн майишатдин ва недай суьрсетдин министерстводи. Дигидай цин хиле кIвалахар милли проектрин сергьятра аваз кьиле тухвана ва абуру 3,9 агъзур гектардин майданар кьуна. Нетижа яз, алатай йисуз 2 агъзур гектардилай гзаф чилера прунз гьасилун патал инженервилин цIийи къурулушар туькIуьрнава, 1 агъзур гектардин чиле абур цIийикIа туькIуьр хъувунва.
«И проектдин сергьятра аваз, дуьгуь ва лапагрин як гьасилдай 20 кластер тешкилнава. Ида лагьайтIа, суьрсетдин кьадар артухарда ва ери хъсанарда. Идалайни гъейри, хуьруьн майишатдин хел еримлу авуни къецепатан уьлквейрай гъизвай суьрсетдин кьадар тIимиларунал ва къецепатан уьлквейрихъ галаз алишвериш авун патал Россиядин мумкинвилер артухарунал гъизва. И проектар уьмуьрдиз кечирмишунин нетижада Дагъустандин хуьруьн майишатдин къурулушар авай гьал, чкадин агьалийрин агьваллувал хъсан патахъ дегиш жезва, кIвалахдин цIийи чкаяр арадал къвезва ва, санлай къачурла, региондин экономика виликди физва», — къейдзава министерстводи.
* * *
Дагъустандин хъвадай целди таъминардай къурулуш бинедилай цIийи хъувунин ва ремонт авунин игьтияж арадал атанва. Россиядин Федерациядин виридалайни чIехи республикайрикай сад тир Дагъустанда хъвадай цихъ галаз алакъалу гьалар муракаббур яз гзаф йисар я. Яд бес тахьун ва адан ери татугайди хьун — ибур агьалийрин тIал алай месэлайрикай анжах бязибур я. Амма республикадин гьукумдарри гьалар хъсан патахъ дегишарун патал серенжемар кьабулзава ва мукьвал тир гележегда хъвадай целди таъминардай цIийи объектар ишлемишиз вахкун лазим я.
ИкI, РД-дин Гьукуматдин Председатель Абдулмуслим Абдулмуслимован гафаралди, мукьвал тир пуд йисан вахтунда и рекьиз тахминан 8 миллиард манат чара ийидайвал я. И такьатар цин къурулушдин талукь объектар эцигуниз ва цIийикIа туькIуьр хъувуниз серфда.
«Дагъустан Республикадин государстводин программайрин сергьятра аваз, алава финансар чара ийидай къарар кьабулдайвал ийиз алакьнава: 11 объектдин капитальный эцигунрин кIвалахар тамамарун патал региондив 7,7 миллиард манат агакьда», — къейдна А.Абдулмуслимова.
Хъвадай яд бес тахьунин месэла гьялун патал цин объектрал бинедилай ремонтдин кIвалахар тамамарна кIанзава. Ида и хиле жезвай аварийрин вилик пад кьадай, агьалияр хъвадай михьи целди таъминардай мумкинвал гуда. «Михьи яд» федеральный проектдин сергьятра аваз, хабар гузвайвал, 32 километрдин «Чиркей-Буйнакск» цин турба тухуз алакьнава. 2024-йисуз, малум хьайивал, целди таъминардай 4 объект ишлемишиз вахкудайвал я.
Амина Муслимова
