Лезгистандин рухвайри са чIавузни душмандин вилик ажузвал авунач, я ийинни ийидач. Абурун дамарра къекъвезвайди Куьре Мелик, Гьажи Давуд, Михаил Лезгинцев, Валентин Эмиров, Эсед Салигьов, Асрет Алиев, Араз Алиев, Мирза Велиев, Абас Исрафилов хьтин игитрин иви я.

«Эй лезги халкь, душман винел атана, Къарагъ кIвачел, къул хуьз экъечI!» — эвер ганай Куьре Мелика ва вич кIвенкIве хьанай кьушунрин.

Гьажи Давудакай Седакъет Керимовади кхьизва:

«Тур гъилевай са кьвал тир ам,

Садавайни тежедай рам.

Са эл хуьзвай кIватIал тир ам,

Чи дагълар хьиз — тагудай чам…

Игитар са чIавузни рекьидач. Абурун тIварар чи мецел ала, чпикайни­ лекьер жеда. Гьавиляйни, белки, цавун аршда лекь акур кьван, заз акI жеда хьи, ам Валентин Эмиров­ тир хьиз. Гуржийрини лезги халкьдиз, дагъустанвийриз, «леки» лугьузвайди абур, лекьер хьиз, викIегь тирвиляй тир. А викIегьвал са чIавузни квахьдайди туш, ихьтин ерияр асилрилай асилрал къвезвайди я.

Къе вагьши душманри, фашистри РагъакIидай патай Россиядиз чпин кIирер экъиснавайла, чи лекьерин иви ргазва, абур Ватан, халкь, къул, гьахълувал хуьз майдандиз экъечIнава. Лекьер са чIавузни душманриз муьтIуьгъ хьайиди туш, я женни ийидач!

Алай вахтунда Украинада кьиле физвай серенжемдани чи лекьери чпин гужлувал къалурзава. Ингье мукьвара мад са лезги лекьрен игитвилиз Дагъустандин Кьил Сергей Меликова лайихлу къимет гана: «Россия — зи тарих я» паркуна кьиле фейи мяре­катдал старший сержант Гьасанов ­Набир Серкеровичаз «Дагъустан Рес­публикадин вилик лайихлувилерай» орден гана.

1988-йисуз Хив райондин Кашанхуьре дидедиз хьайи, ДГПУ-дин физкультурадин факультет акьалтIарай Набир 2010-йисуз хушуналди армиядин жергейриз фенай.

Сифтедай Волгоградда, ахпа Эрменис­танда аскервал авуна. Гьамиша адан тIвар Гьуьрметдин доскада авай. «Артиллериядин частарин отличник» знакдиз лайихлу хьана. 2020-йисуз  Набираз «РФ-дин ВНГ 94 46 ОБРОН СКО полкунин 20 йис тамам хьунин» медаль гана.

Набир Серкеровича Украинада кьиле физвай женгера сифте йикъалай гатIунна гьунарлувилелди иштиракна. Херсондин ЦIийи Каховка шегьердилай гатIунна, Николаевка, ЦIийи Каменка, Давидоброде ва маса хуьрерани шегьерра душмандихъ галаз дяве чIугваз, 13 касдикай ибарат взводдиз регьбервал гана.

Адан взводдин везифа, чка дегишариз, минометдай душмандиз цIай гун тир.  Командирди лугьузвайвал, взводда вирида стхавилелди, кичIевал течиз, къуллугъзавай.

Набира рикIел хкизва: «ГьикI ятIани, 2022-йисан 23-июлдиз, чун алай чка душмандилай дрондин куьмекдалди гуьзетиз алакьна ва тупарай къатидаказ цIай гуз гатIунна. И хаталу декьикьайра зи вилик взвод къутармишунин месэла акъвазна. Жувакай фикирдай мумкинвал амачир, юлдашар къутармишна кIан­завай. Аллагьдиз шукур, вири взвод, цIипуд кас (ротадин командирни галаз), са цIархни тахьана, яракьар авай Урал машинни гваз, хаталу чкадивай яргъаз акъудиз алакьна. Амма къвалав хъиткьинай снарядди зун са шумуд метрдин яргъаз гадарна. Жув-жувал хтайла, акуна хьи, гъил галамач. Къарагъиз кIан хьана — юзаз хьанач, чапла кIвач ханвай…

Вахтунда агакьай, вич Сиртычай тир прапорщик Шихмегьамедов Шихмегьамедакай ва санинструктор, старший сержант Н.Байрамовакай заз сифте куьмек хьана. Абуру зун ЦIийи Каховкадин госпиталдиз хкай ирид йикъалай самолетда аваз Моск­вадин патав гвай Балашихадин госпиталдиз агакьарна. Ана духтурар захъ лап хъсандиз гелкъвена, заз къуват хкана яргъал фенатIани, зун сагъар хъувуна.

2022-йисан 29-сентябрдиз и госпиталдиз­ генерал-полковник Виктор Стригунов атана, ада зав «Жуьрэтлувиляй» медаль вахкана.

2023-йисан 2-августдиз генерал-пол­ков­ник Захаров Сергей Юрьевич атана ва ада зав «ВикIегьвилин орден» вахкана.

Гьайиф хьи, сагъламвилиз килигна, завай зи взводдихъ галаз санал душмандихъ галаз дяве чIугваз жезмач. Умудзава хьи, зи мурад чи дагъдин лекьери кьилиз акъудда…»

Эхь, Набир стха, лекьери чпин лекьвал ийида. Вунани ви суьгьбетралди, насигьат­ралди абурук руьгь кутадайдал шак алач.

А.Агьмедпашаев,

 РФ-дин журналистрин Союздин член

____________________________

Шиирдин автор — С. Гьамидова

Игит хва Набир

Садра тир вун акурди заз,

Намус-гъейрат, инсанвал гваз…

Ихтияр це хцяй вун кьаз,

Илгьамдалди рахаз, Набир.

 

Акьулдизни кардиз зирек,

Гьалал хьуй ваз дидедин нек!

Ватан хуьз вун хьанач къерех,

Ама къе тIал чIугваз, Набир.

 

Бахтунал ви аламаз вил,

Дяведин цIу галудна гъил…

Гужлу хьуй ви мурадрин гьуьл,

Бахтун лепе къугъваз, Набир!

 

ХьанатIани рикIел хирер,

На туьхуьрнач руьгьдин гьиссер.

Ви уьмуьрди гуй ваз бегьер,

Ви кьилел рагъ ргаз, Набир!

 

Мубарак ваз лайихлу тIвар,

Хкаж хьуй ви цавухъ яшар!

Серкер буба, диде Сувар,

Сагъ яз, кьилел алаз, Набир!