Ахцегь райондин администрациядин пресс-къуллугъдай “Лезги газетдиз” хабар гайивал, Дагъустандин здравоохраненидин министр Жамалудин Гьажиибрагьимова Ахцегь райондин муниципалитетда агьалияр кьабулна. Ана гьакI райондин кьил Осман Абдулкеримова, адан заместитель Мегьамед Гъаниевани иштиракна.
Райондин агьалийри, здравоохраненидин, образованидин хилен пешекарри, тешкилатрин ва идарайрин кьиле авай ксари, бизнесдин, спортдин сообществодин векилри, вири санлай 13 касди, чпин тIал алай, къалабулух кутазвай месэлайрикайни тIалабунрикай лагьана, суалар ва теклифар гана.
Райондин собранидин депутат Леонард Атлуева районда Сбербанкдин отделение, гьакIни алава банкоматар ачухун тIалабна, гьикI хьи, Ахцегь, Докъузпара ва Рутул районрин агьалийрин къуллугъда авайди са банкомат я. Амни мукьвал-мукьвал къайдадикай хкатзава. Здравоохраненидин министрди Сбербанкдин Махачкъалада авай ведомстодин кьиле авай касдиз гьасятда зенгна, ада куьмек гудайдахъ инанмишарна. Ахцегьа Сбербанкдин офис ачухун пландик кутунва.
Къурукаларин СОШ-дин директор Гьайдар Эльдарова хуьруьз газ гъунин месэла къарагъарна. Райцентрадилай хуьр анжах 5 километрдин яргъа ава. Республикадин органриз шумудни садра арза авурла, пулдин такьатар авач лугьуникай далда кьазва.
“Елена” фирмадин векил, Ахцегьа цIийи больница эцигун гъиле кьунвай Абдул Абдуллаева а объект акьалтIарун патал пулдин такьатар чара авун тIалабна. Райондин центральный больницадин кьилин духтур Мери Исмаиловади, ана зегьмет чIугвазвай Диляра Жалиловади, Фариза Миспагьовади ва Айна Гъафаровади куьгьне больницадин дарамат ремонт авунин, электрикдин кьилдин линия тухунин, котельня капитальнидаказ ремонт авунин лазимвал авайди къейдна. Идалайни гъейри, Хинерин хуьруьн больница ремонт авун, Цуругъа ва КьакIа ФАП-ар эцигун чарасуз тирдакай ва икI маса месэлайрикай лагьана.
Ахцегьрин хуьруьн агьали Арсен Агъамугъланова аялрин бахчайра чкаяр бес тежезвайвилин месэла къарагъарна. Райцентрада агьалийрин кьадар саки 15 агъзурдав агакьнава. КIвалахдал алай диде-бубайривай чкаяр авачирвиляй чпин аялар аялрин бахчайриз ракъуриз жезвач. Месэла гьялун патал цIийи бахча эцигунин лазимвал авайди къейдна А.Агъамугъланова.
Ахцегь райондин общественный палатадин председатель Али Исмаилова райцентрада хъвадай ерилу яд бес тежезвайдал фикир желбна. Ада республикадин кьиле авай ксаривай Рутулай Ахцегьиз ва Хинерин дередай гъанвай цин турбаяр цIийибуралди эвезун патал пулдин такьатар чара авун тIалабна. Райондин кьил Осман Абдулкеримова хсуси такьатрин гьисабдай хъвадай яд патал буругъдин 4 къуй эгъуьннавайди, амма 15 агъзур кас яшамиш жезвай Ахцегьар патал им тIимил тирди къейдна.
Ахцегь райондин агьалийрик секинсузвал кутазвай вири месэлайрай Жамалудин Гьажиибрагьимова, Осман Абдулкеримова абур гъавурда туна. Гуьруьшдал къарагъарнавай месэлаяр республикадин кьиле авай ксарал, талукь министерствойрал ва ведомствойрал, депутатрал агакьардайди къейдна.
Министр вичин заместителар, талукь идарайрин кьиле авай ксар галаз райондин центральный больницадиз, анин эцигна акьалтI тавунвай дараматдиз, аялрин санаторийдиз, чахуткадин больницадиз (ина абуру идарада зегьмет чIугвазвай ксарихъ ва стационарда сагъарзавай азарлуйрихъ галаз суьгьбетарна) фена.
Чи мухбир
