“Лезги газетдиз” Сулейман-Стальский райондин администрациядин пресс-къуллугъди хабар гайивал, муниципалитетдин АПК-дин кар алай хилерикай сад уьзуьмчивал я. ЦипицIар кIватI хъувунин ва уьзуьмлухрин майданар артухарунин жигьетдай республикада кIвенкIвечи чкадал алай Сулейман-Стальский районда алай вахтунда и хиле къазанмишзавай агалкьунар Советрин девирдинбуруз барабар хьанва.
Пешекарри къейдзавайвал, алай йисуз райондин майишатри 10 агъзур тонндив агакьна ципицIар гьасилун мумкин я. Гьар са гектардай юкьван гьисабдалди 88,1 центнер бегьер кIватI хъийида.
Алай вахтунда районда уьзуьмлухрин майданри 1648 гектар тешкилзава. Муниципалитетда виниз тир бегьерар гудай уьзуьмлухар кутунай инвестицийрин проектар уьмуьрдиз куьчуьрмишун давамарзава. “Зардиян”, “Гуьлгери-вацI”, “Дербент Агро”, “ЧIереяр”, “ДаркIуш” ООО-ра, “Заря” СПК-да алай йисуз хъсан бегьерар вилив хуьзва.
Лагьана кIанда, гьасилай суьрсет маса гунин месэла важиблуди яз амукьзава. Бязи майишатра вахтуналди кIвалахдайбур бес жезвач. ЦипицIар гьялзавай карханайрини вири майишатривай бегьер кьабулзавач, гьар жуьредин багьнайралди къиметар агъузариз алахъзава.
Гьа са вахтунда Сулейман-Стальский райондин са жерге майишатри Дербентда цIийиз эцигнавай чехирринни коньякрин заводдихъ, “Къизлярдин коньякрин завод”, “Дербентдин игристый чехиррин завод” АО-рихъ, Дербентдин коньякрин комбинатдихъ галаз ципицIар маса гунин жигьетдай икьрарар кутIуннава.
Къейд ийин хьи, райондин руководстводи чкадин майишатри ципицIар маса гунин месэла хсуси гуьзчивилик кутунва. Уьзуьмар гьялдай карханайриз бегьер маса гунин карда абуруз куьмекун патал Сулейман-Стальский райондин администрацияди РД-дин хуьруьн майишатдин ва недай суьрсетдин министрдиз махсус чар рекье твадайвал я.
Чи мухбир
