Чи бажарагълу жегьилар
Алай девирда информтехнологияр йигиндаказ виликди физва. Илимдин накь зурбабур яз акур бязи цIийивилер куьгьне жезва, къиметдай аватзава ва масабур майдандиз акъатзава. Инсандиз ихьтин гьалара девирдин вилик рекьерал экъечIун къвердавай четин жезва. Бажарагълу, кар чидай юристдин куьмек, ахтармишунар галачиз, я карханадилайни майишатдилай, я и ва я маса идарадилай вичин кIвалах бажармишиз алакьдач. Гьа са вахтунда анжах вуз куьтягьуналди и ва я маса юристдивай вичин пешедай агалкьунар къазанмишиз жедач, кьетIен алакьунар, пешедал рикI хьун ва ихьтин маса ерияр лазим къведа. Чахъ гьа ихьтин ксарни авазва. Чебни – жегьилар.
ИкI, мукьвара чав Лондондай шад хабар агакьна: чи лезги руш Малика Гъазалиевади а шегьердин Королевский колледжда магистрвилин диссертация «вад» къимет къачуналди хвена. Им чи ватанэгьлидин сад лагьай агалкьун туш.
Малика 1997-йисуз Махачкъалада дидедиз хьана. 2014-йисуз Москвада МГИМО-дин международный праводин рекьяй факультетдик экечIна. Анин эхиримжи курсуна авайла, къецепатан крарин министерстводин яракьар чукIур тавунин ва абурал гуьзчивал авунин рекьяй департаментда стажировкада хьана. Адан кIвалахдиз РФ-дин МИД-дин пешекарди хъсан къимет гана.
Вуз куьтягьайла, хкягъунин са шумуд паюникай ибарат муракаб кIвалахда (отбор) Маликади гъалибвал, Англиядин налогринни юридический Fznst g younq компанияди стажировкада жедай ихтияр къазанмишна.
Медиатехнологийрин индустриядин проектрал кIвалахдайла, Маликадин информационный праводин рекьяй виликди финин ашкъи мадни артух хьана. И кар кьилиз акъудун патал Англиядиз фена.
Алай вахтунда Маликади дуьньяда зурбабурукай тир Блокчейн компанияда юрист-консультантвиле кIвалахзава, интеллектуальный хсусиятдин рекьяй коммерциядин икьраррал, абур гьазурунал, компаниядин къенепатан сиясат туькIуьрунал машгъул жезва. Идалайни гъейри, ада международный жуьреба-жуьре компанийриз налогрин аудитдайни къуллугъзава. Адаз испан, ингилис чIаларни хъсандиз чизва.
Криптовалютадай юридический ахтармишунар, компаниядин интеллектуальный хсусият хуьнин месэлайрай США-дин судриз арзаяр (исковые) ва маса документар, киберхатасузвилин рекьяй проектар ва презентацияр гьазурун — ингье Маликадин асул кIвалах квекай ибарат ятIа.
Лондонда праводин рекьяй докторвилин диссертация хвена, чи бажарагълу рушаз вичин чирвилер, алакьунар, хтана, хайи ватанда ишлемишдай мурад ава.
Ери-бине Ахцегь райондин Хуьруьгай тир Маликадин буба Малик Межидович – экономикадин илимрин доктор, диде Земфира Жамаловна экономист я. Абур Калугадин областдин Обнинск шегьерда яшамиш жезва.
За ва «Лезги газетдин» редакциядин коллективди Маликадиз къазанмишнавай дережа, гьакIни 8-Мартдин сувар мубаракзава, чаз адахъ мадни еке агалкьунар хьана кIанзава. Бахтлу хьурай, виликди фирай чи жегьилар!
Джамил Насибов
