Гьелягьралди
Махачкъаладин полициядин къуллугъчийри тахсиркарвал авунай шак физвай 23 йисан яшда авай агьали кьунва. Идакай РД-дин МВД-дин пресс-къуллугъди хабар гузва.
Къейдзавайвал, Къизилюрт райондай тир жегьилди, кичIерар гуналди республикадай тир кьве дишегьлидивай 321 агъзур манат къачуна. Тайинарнавайвал, ада, дишегьлияр айибардай, намус ва лайихлувал абурдай вегьедай малуматар халкьдин арада чукIурда лугьуз, гьелягьар кьаз хьана. И кар тавун патал вичи тIалабзавай картадиз винидихъ къалурнавай кьадар пул ракъурун истемишна.
Полицейскийри шак фенвайди отделдиз хкана. ЧIуру ният авайда ихтилат авурвал, ада телефондин цIийи нумра къачуна ва интернетдин мессенджер кардик кутуна. Мессенджерда адаз нумрадин виликан сагьибдиз талукь тир хсуси шикилар амайди акуна. «Мез хуьнин» къимет яз, ада тайин такьатар къачун кьетIна.
И делилдай суд-дуван авун патал материал кIватIнава.
Лутувал дуьздал акъудна
Махачкъаладин полицейскийри юзан тийидай объектрихъ галаз алакъалу лутувилин делил винел акъуднава.
Дагъустандин МВД-дин УЭБеПК-дин къуллугъчийри тайинарнавайвал, Гергебил райондин 61 йисан яшда авай агьалиди, пай кутуналди эцигунра иштиракуниз талукь РФ-дин къанундин истемишунар чIуруналди, Махачкъала шегьерда гзаф мертебайрикай ибарат кIвал хкажун патал 2 ватандашдин пулунин такьатар къачуна.
А касдиз къалурнавай кIвал эцигунин ихтиярар авачир, амма лутувилелди ада 2 ватандашдивай 5 миллиондилай гзаф пул къачуна.
И делилдай суд-дуван авун ва къарар кьабулун патал материал кIватIнава.
«Лезги газет»
