31-июлдиз Ахцегь райадминистрациядин залда райондин активдин нубатдин совещание хьана. Сифте гаф рахуналди, ам «Ахцегь район» муниципалитетдин кьил Осман Абдулкеримова ачухна ва кьиле тухвана.
Йикъан месэлайриз килигдалди вилик ада футболдай райадминистрациядин командадив РД-дин Конституциядин Йикъаз талукь яз тухвай акъажунра гъалибвилин 1-чка кьунай Гьуьрметдин грамота ва махсус кубок вахкана.
Налогар кIватIунин ва чилерни капитальный эцигунар (ОКС) актуализироватунин месэладай гаф муниципалитетдин экономикадин отделдин къуллугъчи Фатима Агьмедовади къачуна. Ада къейд авурвал, 7 вацран нетижада санлай райондин налогрин пландин тапшуругъар эменнидай 104 % ва чилин налогдай 108 процентдин тамамарнава. Анжах са Смугъулрин хуьруьн администрация квачиз амай вири СП-ра планар артухни алаз ацIурнава. Капитальный эцигунар (ОКС) ва чилер актуализироватунин жигьетдай райондин пландин тапшуругъар 109 ва 75 процентдин кьилиз акъуднава. Законсуздаказ кIвалахзавай ксар ГНИ-да регистрация хъувунин месэлани писдаказ тешкилнавач: анжах са июлдин вацра райондин гъвечIи бизнесдин карханайра кIвалахзавай 10 кас дуьздал акьулдна регистрация хъувунва.
РУО-дин начальник Алмас Гьажиев райондин мектебар кIелунин цIийи йисаз гьазурунин месэладал акъвазна. «Вахтунда финансламишуникди вири школайра ремонтрин кIвалахар активныйдаказ кьиле физва, бязи чкайра и кар бегьемарнава. Мумкин тир пожаррин вилик пад кьадай цIийи щитар маса къачуна эцигзава, сигнализацияр тадаракламишзава ва икI мад. Гьа са вахтунда ремонтдин пулар агакь тавуникди алава образованидин идарайра ремонтрин кIвалахрив гьеле эгечIиз хьанвач»,- къейдна ада.
Райадминистрациядин крар идара ийизвайди тир Вадим Агъасиева залдавайбурун дикъет Роспотребнадзордин ахтармишунрин справкада къалурнавай СанПИН-дин нукьсанар (предписанияр) арадай акъудунин месэладал желбна. Ада гьакI райадминистрацияда райондин кьил Осман Магьмудовичан гуьзчивилик кваз кадрийрин резерв тешкилзавайдан ва акьалтIай важиблуди тир и серенжемда иштиракун патал 22-45 йисан яшаравай пешекарривай 30-августдалди администрациядин комиссиядиз арзаяр вугуз жеридан гьакъиндай малумат гана.
Совещанидал гьакI райадминистрациядин кьилин заместитель Мегьамед-Рауф Гъаниев (веревирдзавай месэлайрай ада вичин фикирар лагьана), умуми отделдин кьилин пешекар Расим Османов (ам ГИС ЖКХ-дин месэлайрал акъвазна), санэпидстанциядин кьилин духтур Арсен Касимов (ада залдавайбурун фикир районда михьивал хуьнин кIвалах хъсанарунин, жемят хъвадай михьи целди таъминарунин месэлайрал желбна) ва масабур рахана.
Эхирдай Осман Абдулкеримова алатай совещанидал гайи вичин тапшуругъар кьилиз акъудзавай гьал ахтармишна ва чпин везифайрив жавабдарсузвилелди эгечIзавай руководителризни пешекарриз туьгьмет авуна.
Дашдемир Шерифалиев
