И йикъара Кьурагь райондиз медениятдин управленидин начальник кьиле аваз Дербентдин азербайжанрин гьукуматдин драмтеатрдин яратмишзавайбурун десте мугьман хьана. И гьакъиндай «Лезги газетдиз» райондин администрациядин пресс-къуллугъди хабар гузва.
Театрдин артистрин дестедик режиссер Якъут Хандадашев, театрдин директордин заместитель Ядуллагь Гьашимов, РД-дин лайихлу артистар тир Севда Бейбалаева, Магьир Меликов, Магьарам Омаров ва Тамила Мигьрабова квай.
Кьурагь райондин медениятдин кlвале абуру тамашачийриз чlехи концерт гана. Программадик азербайжан ва лезги манияр квай. Райондин агьалийри мугьманар гурлу капаралди кьабулна.
Мярекатдин сифте кьиле Гуьлпери Шабановнади Кьурагь райондин руководстводиз, яратмишзавай работникриз хуш келимаяр лагьана.
Мугьманрин адресдиз чухсагъулдин келимаяр «Кьурагь район» МР-дин кьилин заместитель Жаврудин Халикьова, райондин ветеранрин ва агъсакъалрин советдин председатель Фахрудин Мирзоева ва масабуру лагьана.
Абуру вирида гележегдани адетдин дуствилин алакъаяр мягькемарунин чарасузвал къейдна.
Санлай къачурла, кьурагьвияр мугьманрин кlвалахдилай рази яз амукьна.
«Лезги газет»
