Дербент шегьердин “Нарын-кала” майдандал пуд лагьай сеферда Кеферпатан Кавказдин федеральный округдин дережада аваз футболдин турнир кьиле фена. Адет хьанвай “Тефи” кубок патал и акъажунра ДЮСШ-ра чирвилер къачузвай, чеб 2005-йисуз дидейриз хьанвай аялрикай ибарат ру­гуд дестеди иштиракна. Къадим Дер­бент шегьердиз, чпин алакьунар ах­тармишиз, Владикавказдай “Юность” ва “Алания” дестеяр, Ахцегьрин команда, Махачкъаладин “Политех”, Кеферпатан Осетия-Аланиядин Ардон шегьердин “Спартак” атанвай.

Финалдин къугъунра майдандин иесияр тир “Тефи” “Политехдихъ” га­лаз гуьруьшмиш хьана. 1-таймда май­дандин ие­сийрин командадин ве­кил Къурбан Рагьимова туп яна. Эхирдалди гьа и гьисаб­далди къугъвай “Тефи” турнирдин гъалибчи хьана­.

Кьвед лагьай чка Махачкъаладин “Политехди”, пуд — Владикавказдин “Юность” командади кьуна. Хъсандиз къугъвайбурукай тир Ардон шегьердин командадиз 4-чка гана.

Турнирда кIвенкIвечи чкаяр кьурбур кубокриз, медалриз, дипломризни грамотайриз лайихлу хьана. Жаван 12 футболистдиз “Тамашачийрин патай призар” гана. Спортди­н и мя­рекатда иштиракай яшариз ви­ри­далайни гъвечIи футболист, “Те­фи­дин” векил Асад Асадов руьгь ку­ту­нин приздиз лайихлу хьана. Акъа­жунрин хъсан варар хуьдайди (Алим Къазиев — “Те­фи”), защитник (Халил Сул­танов — “Те­­фи”), гьужумдайди  (Мугьаммад Менафов — “Те­фи”), бомбардир (Са­ид Букаев — “Политех”), полу­защит­ник (Батраз Гиголаев — “Юность”), тре­нер (Сослан Береев — Вла­дикав­каз) тайинарна.

Турнирдин иштиракчийри, тамашачийри, шегьердин спортдин ветеранри футболдин и акъажунрин тешкилатчи ва спонсор Тельман Гьамза­еваз, Физули Сагъуеваз, Дербентдин “Тефи” командадин тренер Ибра­гьим Султановаз сагърай лагьана.

Спортсменар, турнирдин мугьманар ва тамашачияр патал Дербентда сейрарни тешкилнавай. Абур На­рын-къеледал, I Пётрдин кIвализ, Жуьмя мискIиндиз ва шегьерда туристриз итижлу маса чкайриз тухвана.

Салман Гьажиев