Чи халкьдин баркаллу векилар авай чкаяр чаз, абурун агалкьунар себеб яз, Интернетдин жуьреба-жуьре сайтрай чир жезва.
Къенин чи куьруь ихтилат 2017-йисан 24-июндиз Азербайжандин президент Илгьам Алиеван къарардалди а республикадин сад лагьай вице-президентдин куьмекчивиле тайинарай ва исятдани и къуллугъдал кlвалахзавай лезгидикай — Эльчин Октябрович Амирбеговакай я.
Эльчин Амирбегов идалай вилик Швейцариядин Конфедерацияда ва Лихтенштейн князлухда Азербайжандин посол тир. Алай вахтунда ам Францияда Азербайжандин посол я.
Алакьунар авай лезги 1972-йисуз Бакуда дидедиз хьана. Ана мектеб къизилдин медалдалди куьтягьайдалай кьулухъ ам Азербайжандин чlаларин госуниверситетдик экечlна. Вузни яру дипломдалди куьтягьай Эльчина Германияда НАТО-дин мектебда, Италияда НАТО-дин колледжда чирвилер къачуна. Дипломатвилин рекьяй тежриба кlватlун патал ам Францияда ва США-дин тlвар-ван авай Гарварддин университетда хьана.
Амирбегова 1991-йисалай Азербайжандин МИД-дин къурулушдани (центральный аппаратда), гьакlни Нью-Йоркда ООН-дин къвалав гвай Азербайжандин гьамишалугъ векилханада ва Брюсселда НАТО-дин патавни кlвалахна.
2004-йисалай ам Женеведа ООН-дин отделенидин къвалав Азербайжандин гьамишалугъ векилханадин ва маса тешкилатрин кьиле акъвазна.
Эльчиназ, вичин хайиди тир лезги чlалалай гъейри, ингилис, френг, урус ва туьрк чlаларни чизва. Кlвалахдикай азад вахтунда ам спортдал — дзюдодал ва баскетболдал — машгъул жезва.
Алакьунар авай пешекар Эльчин Октябрович мадни кьакьан дережайрив агакьун чи мурад я.
Гьазурайди — Куругъли Ферзалиев
