Гьаж мусурман патал важиблу крарикай сад я. Пак чкайриз ийизвай сиягьатда четинвилер ацалт тийидайвал, са шумуд къайдадал амална кIанзава.
Сад лагьайди, гьаждал физвайбур патал тур-операторри тешкилзавай лекцийриз фин герек я. Суалар гуз регъуь жемир, рикIелай алатзаватIа, жавабар чарчел кхьихь. Квелай вилик гьаждал фена хтанвай инсанрихъ галаз алакъа хуьх. Абурухъ и рекьяй авай чирвилерни тежриба квез герек къведа.
Россиядин гьаж-миссиядин регьбер Мегьамед Гьамзаева къейдзавайвал, гьаждал физвайбуру чарасуз тир вири рапар яна кIанзава. Сифте нубатда — гриппдиз ва менингококкдин садакай масадак акатдай азардиз акси рапар. Чебни рекье гьатдалди цIуд югъ амаз. Гьар садав рапар янавайди тестикьарзавай сертификат хьун лазим я.
Эгер гьаждал физвайбурун арада азарлу инсанар аватIа, жував раб-дарман хьун тIимил я, ихьтинбуру гьаждал физвайбурухъ галай духтурдиз чпикай хабар гана кIанда.
Шазанандав гекъигайла, алай йисуз гьаждал физвайбуруз ийизвай бязи къуллугърин къиметар хкаж хьанва. Мисал яз, Мина дереда алачухда амукьун 220 доллардилай 320-дал кьван хкаж хьанва. Им къулай цIийи шартIар арадал атунихъ галаз алакъалу я. Алачухрик кондиционерар кардик кутунва, ксузвай чкайрин кьадарни артухарнава. Къейд ийин хьи, Мекка-Мина-Арафат-Муздалифа-Мина-Мекка маршрутда авай автобусда аваз финин къиметни 50 доллардилай 98-дал кьван хкаж хьанва.
Идалай гъейри, 2017-йисуз Саудрин Аравиядин гьукумди кьабулнавай къарардал асаслу яз, кьвед лагьай сеферда гьаждал ва умрадиз физвайбуру алава 535 доллар пул хгана кIанзава.
( “Ас-салам” газетдай )
