ГъвечIи чIавалай далдам ягъунал машгъул Мягьедин Муртазалиева Ахцегь райондин музшколада муаллимвиле кIвалахиз хейлин йисар я. Адан рагьметлу буба Агьмедни хъсан далдамчи тир.
Школа куьтягьайдалай гуьгъуьниз ам вичин пак буржи тамамарун патал армиядин жергейриз фена. Аскервиляй хтай М.Муртазалиева Махачкъаладин кьуьлеринни манийрин ансамблда 5 йисуз концертмейстервиле кIвалахна. 1996-йисуз Каспийскдин музыкадинни хореографиядин лицейда муаллимвална.
Ахцегьа ада райондин музшколада аялриз далдам ягъунин сирер чирзава. Ада вичин хъсан бажарагъ авай ученикрикай Шемсидин Садыхован, Сабина Мамедовадин, Рамазан Алиеван, Адам Залбегован, Мегьамед Гъаниеван, Мурад Муртазалиеван, Мадина Магьарамовадин ва масабурун тIварар кьазва. Аялар райондин ва республикадин дережадин конкурсриз хъсандиз гьазурунай ам са шумудра гьуьрметдин грамотайриз, къиметлу пишкешриз лайихлу хьана.
Вичин чирвилерин дережа хкажун патал алай вахтунда М.Муртазалиева заочнидаказ Махачкъаладин культурадин колледжда кIелзава. Ада вердишарай Хийируллагь Муртазалиевакай, Эльдар Эфендиевакай, Амран Сулеймановакай, Рамазан Балалиевакай ва масабурукай райондин ва Махачкъаладин мектебра кIвалахзавай, мехъеррик иштиракзавай хъсан музыкантар хьанва.
Рагьидин Эминов
