Чи ватанэгьли капитан Султанмурадов Рагьман и йикъара отпускдиз хтанвай. Зун адахъ галаз гуьруьшмиш хьана. Рагьман 1991-йисуз Белиж поселокда погранкъуллугъдин прапорщик Эдикан хизанда дидедиз хьана. 2008-йисуз ада Белиждин гимназияда 11-класс акьалтIарна. Школада хъсан къиметралди кIелна.
Дахди къуллугъзавай частунин аскеррал, офицеррал, абурун военный парталрал, низамдал Рагьман гъвечIизамаз ашукь хьанвай. Военный къуллугъчийрин хизанра чIехи хьанвай гзаф гадайри хьиз, Рагьманани вичин бубадин рехъ давамарун кьетIна. Вичин рикIе авай мурад кьилиз акъудун патал ам Москвадин командирар гьазурдай высший училищедиз гьахьна. ЭкечIиз кIанзавайбурун кьадар гзаф тир. Баллар бес тахьуниз килигна, ам элкъвена хтана, амма руьгьдай аватнач, чирвилер хкаж хъийиз, беден мягькемариз алахъна. 2010-йисуз ам имтигьанрай экъечIна. 2012-йисуз ада кIелзавай училищедиз РФ-дин миноборонадин приказдалди институтдин статус гана. 2014 -лагьай йисуз Рагьмана ам агалкьунралди акьалтIарна. Ана кIелай йисара гележегдин офицерди дерин чирвилер къачуна.
Лейтенант Приволжский Федеральный округдин Чувашиядин Чебоксары шегьердин къенепатан кьушунрин взводдин командирвиле къуллугъиз рекье туна. Саки пуд йисуз ина къуллугъайдалай гуьгъуьниз ам Чувашияда авай Росгвардиядин управленидиз дестедин командирвиле ракъурна. Кьве йисалай Рагьман Татарстандин Казан шегьердиз акъатна. Ина ада пуд йисуз ротадин командирдин заместителдин везифаяр тамамарна. 2022-йисан февралдин сифте кьилерай ада къуллугъзавай рота Белгороддин областдиз рекье туна. Махсус серенжемдив гатIунай сифте йикъалай ада военный гьерекатра иштиракна. 2023-йисан сифте кьилелай Башкортастанда Росгвардиядин управленида отделдин начальник яз къуллугъзава.
«Армияда къуллугъ авун — еке жавабдарвал я. Армияди лигимарда. Ана халисан дустар жагъида. Вилик акъвазнавай месэлаярни жува гьялиз чирда», — лугьузва Рагьман Султанмурадова.
Инанмиш я хьи, гъалибвал чи пата жеда. Къуллугъдин везифаяр викIегьвилелди тамамарзавай викIегь офицер «Жуьрэтлувал къалурунай», «Къуллугъда тафаватлу хьунай» медалрин сагьиб я. Махсус серенжемдин иштиракчи женгерин гьерекатрин ветеран я.
Рагьмананни адан уьмуьрдин юлдаш Эбидадин хизанда кьве аял тербияламишзава. Къуй Ватандиз къуллугъзавай квехъ чандин сагъвал, хизанда хушбахтвал хьурай!
Къагьриман Ибрагьимов
