Вилик сенгеррал
Къенин гьакъикъат ахьтинди я хьи, Россиядин Федерация, халкь такIанзавай уьлквейри, пачагьри, военныйри, политикри, экономистри чпин алчах мурадрикай ачухдиз малумарзава, чпин гаф акатзавай виридаз Россия зайифарунин кардик къуьн кутуниз эвер гузва. Украинада военный махсус серенжем давам жезва.
США-ди, коллективный Западди Зеленскийдин режим мадни яракьралди, долларралди таъминарзава. НАТО-дин кьилевайбуру ислягь инсанрик къурху кутадай гьараюнар ийизва. Ихьтин къалабулухрин вахтунда Ватан хуьн, адаз къуллугъ авун гьар са ватандашдин кьилин игьтияждиз, мураддиз элкъуьн лазим я. Уьмуьрди гьа икI тирди успатни ийизва. Чи уьлкведин рухвайрини рушари неинки дяведин серенжемра уьтквемвал, жуьрэтлувал къалурзава, гьакI гьар са хилени агалкьунралди, уьлкведин экономика мадни вилик тухун патал зегьмет чIугвазва.
Чна гьар йисан 23-февралдиз Ватандин къаравулда акъвазнавай кьегьалар рикIел гъизва, абурун гьуьрметдай хуш келимаяр лугьузва. И юкъуз чна четин, амма гьуьрметлу пеше — Ватандиз вафалудаказ къуллугъ авунин, уьлкведин милли итижар хуьнин, адан оборонадин бажарагълувал мягькемарунин, чи ватандашриз уьмуьрдин ислягь, къулай, Россия дурумлудаказ вилик финин шартIар яратмишунин пеше хкянавай ксар тебрикзава, агъур имтигьанрин йисара хайи чил душманрикай хвейи гзаф несилрин, дирибаш аскеррин кьегьалвилер халкьди рикIелай алуд тийизвайдакай лугьузва.
Ватандиз къуллугъ авуникай, ам кIан хьуникай уьлкведин Президент Владимир Путина Ватандин ЧIехи дяведин нетижайриз талукьарнавай вичин макъалада гьар садаз таъсирдайвал кхьенва: «Зун рикIивай агъунва хьи, арадал къвезвай четин гьалари истемишзавайвал ва, чанни гьайиф татана, буржи намуслувилелди кьилиз акъудун хьтин ери Россиядин инсанриз хас лап кьилин къилих я. Къенин юкъузни чан къурбанд ийиз гьазур хьун, ватанпересвал, кIвализ, хизандиз, Ватандиз авай кIанивал хьтин ерияр Россиядин общество патал лап бинелубур, къакъудиз тежербур яз ама. Гьа и ерияр чи уьлкведин аслу туширвал субутарзавай бинеярни я…»
Алай вахтунда чи Яракьлу Къуватар дуьньяда ислягьвал хуьнин, коллективный Западдин чапхунчивилин гьерекатрин вилик пад кьунин ва международный террориствилин организацийриз акси женгинин вилик сенгеррал ала. Инсаният дяведин цIук кутадай фикиррал алай къуватар артух жезва. Абурун вилик пад кьун тавуртIа, дуьньядин халкьар пара хаталувилик акатда. Гьавиляй Россиядин регьберри Яракьлу Къуватрин къудратлувал, мягькемвал мадни хкаждай серенжемар кьабулзава.
Лугьун лазим я хьи, Ватан хуьнин буржидиз вафалу рухваяр, рушар уьлкведа гзаф ава. Гьа гьисабдай яз, – Дагъустандани. И кар абуру Ватандин ЧIехи дяведин мусибатдин йисара, фашистрин кьушунри чукIурай, кайи, барбатI авур хуьрер, шегьерар, карханаяр, майишатар кIвачел ахкьалдардайлани, пятилеткайрин планар кьилиз акъуддайлани, стха уьлквейрин тIалабуналди интернационалиствилин буржи тамамардайлани, 1999-йисуз Дагъларин уьлкведал яракьламиш хьанвай бандитрин дестейри вегьейлани, уьтквемвилелди кьилиз акъудна. Бубайрин баркаллу крар къе жегьил несилри давамарзава. Сагърай чеб! Къуллугъдин, кеспидин везифаяр намуслувилелди, уьтквемвилелди кьилиз акъудай гьар са кьегьалдин крар, игитвилер чи жаванриз хъсан чешне я.
Нариман Ибрагьимов
