19-февралдиз РД-дин Кьил Сергей Меликова РФ-дин Хатасузвилин Советдин председателдин заместитель Дмитрий Медведеван регьбервилик кваз Грозный шегьерда кьиле фейи совещанида иштиракна.
РФ-дин Яракьлу Къуватрин комплект тамамдиз ацIурунин месэладай СКФО-дин регьберрихъ галаз кьиле тухвай мярекатда Д.Медведева къейд авурвал, алай йисан февралдин вацран делилралди, Россиядин спецназдин университетди 16 агъзурдалай виниз ксар гьазурнава. «Чирвилер, вердишвилер къачурдалай кьулухъ абур дяведин махсус серенжемда иштиракун патал рекье туна. СВО-дин зонада выпускникри женгинин рекьяй хъсан ерияр, жуьрэтлувилер, мягькемвилер ва гъалибвал къачунин гьевес къалурзава. Оборонадин министерстводин делилралди, 1-январдилай санлай уьлкведа кьушунрин сад авунвай дестейриз аскервилин къуллугъдал 53 агъзурдалай гзаф ксар кьабулнава», — къейдна Д.Медведева.
Чечнядин меркезда и юкъуз Д.Медведева «Ахмат» подразделенидик кваз гуьгьуьллувилелди къуллугъзавайбурухъ ва Россиядин, Чечнядин игитрихъ галазни гуьруьш кьиле тухвана.
Салим Салимов
