Дагъустан Республикадин Кьил Сергей Меликов 20-февралдиз Арабрин Сад авунвай Эмиратрин Мугьаммед бин Заидан тIварунихъ галай  гуманитарный илимрин университетдин директор, доктор Халиф Мубарак Аз-Захири кьиле авай делегациядихъ галаз гуьруьшмиш хьана.

РикIел хкин хьи, и мугьманар Дагъус­тандиз январдин вацра атанай ва гьа вахтунда жуьреба-жуьре хилера санал кIва­ла­­хунин терефар веревирд авунай. Ихтилат физвай хилерик туризм, экономика­, ме­деният, образование, экология, хуьруьн ма­­йи­шат ва здравоохранение акатза­ва. Нубатдин гуьруьшдал гьакъикъи тек­­ли­фар­, гьа гьисабдай яз здравоохраненидин,­ туризмдин ва образованидин хилера саyал кIвалахунин мумкинвилер веревирдна.

ОАЭ-дай Дагъустандиз атанвай мугь­манар рикIин сидкьидай тебрик авуналди, Сергей Меликова кьве терефди санал кIвалахун мадни гегьенш жезвайди къейдна .

«Вилик сеферда чна саналди тир проектар уьмуьрдиз кечирмишунин карда кьве терефдизни хийир хкатдайвал санал кIвалахунин мумкинвилериз талукь месэлаяр веревирднай. Гъиле-гъил аваз къарарар кьабулунай за ОАЭ-дин посольстводилай разивалзава. Чи алакъайри гьакъикъи теклифар майдандиз акъудуни зун шадарзава. Чав куь патай тайин куьмек агакьзава. И кардай заз куь халкьдиз ва уьлкведиз сагърай лугьуз кIанзава», — лагьана региондин Кьили.

Вичин нубатдай доктор Халиф Мубарак Аз-Захириди Дагъустандини Араб­рин Сад авунвай Эмиратри санал кIва­лахунин мумкинвилериз разивилин къимет гана.

«Чун гуьруьшмиш хьунин нетижайрикай чна ОАЭ-дин кьилин руководстводив агакьарна. Жаваб яз, уьлкведин регьберди Дагъустандихъ галаз санал кIвалахун вилик тухун лазим тирдакай лагьана. Тек­лифар шадвилелди кьабулна ва амадагвилин, санал кIвалахунин алакъаяр мадни мягькемарун лазим тирдакай малумарна. Чун пара хушвилелди кьабулунай куьн пара сагърай», — лагьана Араб­рин Сад авунвай Эмиратрин Мугьаммед бин Заидан тIварунихъ галай гуманитарный илимрин университетдин директор, доктор Халиф Мубарак Аз-Захириди.

Ада гьакIни ОАЭ-дин президентдин тIварунихъай Сергей Меликовал, уьмуьр­дин юлдаш рагьметдиз финихъ галаз алакъалу яз, башсагълугъвилин гафар агакьарна.

Арабрин делегация республикадин  онкогематологиядин центрадин проектдихъ галаз танишарунни кьиле фена. Ам эцигун здравоохраненидин хиле  кьве терефдини санал кIвалахунин жигьетдай хъсан чешнедиз элкъведа. Мугьманар проектдихъ галаз Дагъустандин вице-премьер Абдурагьман Магьмудова танишарна. Гележегда арадал къведай онкогематологиядин центрадин аялрин отделенида 85 ва чIехибурун отделенида 65 чарпайдин чкаяр жеда.

Арабрин Сад авунвай Эмират­рай­ атанвай мугьманриз Дагъустанда уьмуьр­диз кечирмишзавай образованидин­ «Аль­таир» проектдикайни суьгьбетна. РД-дин образованидин ва илимдин министр Ягья Бучаеван гафаралди, регион­дин центрада бажарагълу аялриз ва жаванриз виликди фидай мумкинвилер яратмишда, ина абуруз «Илим», «Искусство», «Спорт», «Проектар гьазурунин кар» хилерай чирвилер гуда.

Мугьманар Дагъустандихъ туризмдин рекьяй авай мумкинвилерихъ галазни танишарна. РД-дин вице-премьер Муслим Телякавова республикадин вири дуьньяда метлеб авай культурадин, архитектурадин, тарихдин лап гуьрчег чкайрикай, девлетлу ирсиникай, халкьдин сеняткарвилерикай суьгьбетна.

Республикадин Кьили къейд авурвал, жуьреба-жуьре дережайрин мугьманханаяр, глэмпингар, ял ядай зонаяр галай туриствилин объект уьмуьрдиз кечирмишунихъ еке метлеб жеда.

«Туриствилин объектар эцигунин карда куь тежрибадикай менфят къачун чи ватанэгьлийри хушдиз кьабулда. Иллаки куьне гьар са кап чил ишлемишзавай тегьер чаз пара хуш я», — къейдна Сергей Меликова.

Проектдиз мугьманри еке итиж авуна. Талукь ведомствояр проект вичин тамам гьалдиз гъунин меслятдал атанва.

«Кар алайди чи экспертри талукь мес­элаяр чпин арада веревирд авун я. Чилин патахъай лагьайтIа, лап къулай участок теклифзава. Анал мугьманханаяр, алишверишдин майданар, халкьдин сеняткарвал вилик тухудай карханаярни эцигиз жеда. Чи экспертриз дуьньядин гзаф уьлквейра кIвалахунин тежриба ава», — баянар гана Халиф Мубарак Аз-Захириди.

Гуьруьшдин нетижаяр кьадайла, кьве терефни Дагъустандинни ОАЭ-дин арада санал кIвалахунин, амадагвилин алакъаяр мадни мягькемарунин меслятдал атана.

Дагъустандин Кьили вири проектар вичин гуьзчивилик жедайдахъ мугьманар инанмишарна.

Хийир  Эмиров