И йикъара Кьурагь райондин КIирийрин хуьруьн школа-интернатдин залда, Россиядин Игит Зейнудин Батманован экуь къаматдиз бахшна, волейболдай ветеранрин арада кьиле фейи районрин уртах 5-турнирда Мегьарамдхуьруьн, Кьурагь районринни Дербент шегьердин ва Белиж поселокдин командайри иштиракна. Спортдин серенжемдин тешкилатчи райадминистрациядин физкультурадин, спортдин ва жегьилрин крарин рекьяй отдел тир.
ИкI, кругдин къайдада ва къизгъиндаказ кьиле фейи акъажунрин нетижада Кьурагь райондин — 1, Дербент шегьердин — 2 ва Мегьарамдхуьруьн райондин хкянавай командаяр 3-чкайриз лайихлу хьана. Абуруз медалар, грамотаяр, пулунин ва маса пишкешар гана.
Турнирда тафаватлу хьайи кьилдин спортсменрин арада Эльман Къазимегьамедов (Мегьарамдхуьр), Мажлудин Агьмедбегов (Белиж), Рабадан Рабаданов (Дербент), Магьарам Къазиев (Кьурагь) ава. Абуруз хьиз, судьяйрин коллегиядизни, виридалайни хъсан болельщикризни турнирдин тешкилатчийри пишкешар гана.
Гъалиб хьайи командайрив ва кьилдин ксарив пишкешар райадминистрациядин физкультурадин, спортдин ва жегьилрин крарин рекьяй отделдин начальник Рамиз Рамазанова, образованидин отделдин начальник Эльмар Медетова ва КIирийрин хуьруьн советдин кьил Феликс Рагьимханова вахкана.
* * *
Къейд. Са шумуд югъ идалай вилик Россиядин Игит Зейнудин Батмановаз КIирийрин школа-интернатда бюст эцигна. Мярекатда Кьурагь райондин кьил Замир Азизова, школа-интернатдин директор Надир Тагьирова, анин муаллимри ва аялри, хуьруьнвийри иштиракна. Игитрин экуь къаматар чи рикIера гьамишалугъ амукьда.
Регина Семедова
