И йикъара Махачкъалада, Россиядин ФСИН-дин (Федеральная служба исполнения наказаний) Дагъустан Республикада авай Управленида, 2023-йисан кIвалахдин нетижа­яр кьуниз ва алай йис патал кар алай месэлаяр тайинаруниз талукьарнавай гегьенш заседание кьиле фена. УФСИН-дин начальник, къенепатан къуллугъдин генерал-майор Ан­дрей Полякован регьбервилик кваз кьиле фейи адан кIвалахда (управленидик акатзавай идарайрин, отделрин ва къуллугърин жавабдар ксарихъ галаз сад хьиз) республикадин гьукумдин органрин, министерствойринни­ ведомствойрин, общественный тешкилат­рин­, СМИ-рин векилри иштиракна.

Кьилди къа­чуртIа, абурун арада авай: РД-дин Гьукуматдин Председателдин заместитель Рамазан Жафаров, РД-дин прокурордин замес­титель, юстициядин старший советник Сергей­ Антонов, Дагъустандин къенепатан крарин министрдин заместитель — полициядин начальник, полковник Сергей Власов, Россиядин ФСБ-дин РД-да авай Управленидин начальникдин заместитель, полковник Венир­ Фахреев, Россиядин силисдин комитетдин Да­гъустанда авай силисдин управленидин кьил, юстициядин генерал-майор  Дмитрий Беляев, Милли гвардиядин федеральный къуллугъдин РД-да авай Управленидин начальникдин замес­титель, полковник Антон Зу­ев, 102-кьилдин махсус бригададин командир, генерал-майор Дмитрий Чистяков, Суддин приставрин федеральный къуллугъдин РД-да авай управленидин кьил, къенепатан къуллугъдин полковник Алик Алилов ва масабур.

Гегьенш заседание са шумуд касдив­ ведомстводин шабагьар вахкунилай башла­миш­на. ИкI, РФ-дин уголовно-исполни­тель­ный­ къурулуш (УИС) вилик тухуник пай кутунай, гьакIни кадрийрин ва УИС-дин личный составдихъ галаз кIвалахдай къуллугъдин йикъахъ галаз алакъалу яз УИС-да инсандин ихтиярар хуьнин рекьяй къуллугъдин старший инспектор, къенепатан къуллугъдин майор Камил Гьасанбеговав Россиядин ФСИН-дин Гьуьрметдин грамота вахкана. Активнидаказ санал кIвалахунай ва УФСИН-дин кIвалах раиж авунай, гьакIни УИС-дин хъсан, кар алакьдай къуллугъчидин къамат арадал гъуник пай кутунай и цIарарин автордиз, «Дагъустан» РГВК-дин кьилин редактор Елена Алиевадиз ва ана зегьмет чIугвазвай Багьаудин Багьаудиноваз чухсагъулдин чарар гана.

УФСИН-дин регьберди кьилин док­лад башламишдалди вилик, 2023-йисуз управлениди кьиле тухванвай кIвалах­дихъ галаз таниш хьун яз, видеофильм къалурна.

Вичин докладда А.Поляков Россиядин ФСИН-ди 2023-йис патал чпин вилик эцигнавай месэлаяр кьилиз акъудунал, уголовно-исполнительный къурулушда реформаяр кьиле тухунихъ ва адан кIва­лах хъсанарунихъ элкъуьрнавай серенжемрал акъвазна.

— Россиядин Федерациядин Президент В.Путинан тапшуругъар кьилиз акъу­дуналди, дустагънавай ксар мажбуридаказ ийиз тадай кIвалахралди таъминарун патал Дагъустанда шартIар тешкилзава. ИкI, 3 участок арадал гъанва (дуьз рекьел хкидай центраяр яз, анра мад 300-далай виниз ксариз кIвалахдай чкаяр арадал гъидай мумкинвал ава). Алай вахтунда республикадин промышленностдин объектра ахьтин центраяр ачухунин месэладани хъсан нетижайрив агакьнава, — къейдна Андрей Полякова.

Адан докладдай мадни раиж хьайивал, уголовно-исполнительный къурулушда гьалар пайгардик кваз хьун патал УФСИН-да ва адак акатзавай идарайра къуллугъзавай ксарилай, санлай къачурла, вилик эцигнавай месэлаяр кьилиз акъудиз, дустагънавайбур ва силисдик квайбур ихтибарвал ийиз­ жедай ­тегьерда кьилди чара авун таъминариз, ахьтинбур катуниз, санлай гзаф ксари разисузвал малумардай къалабулухриз, кьетIендаказ фикир желбдай тахсиркарвилериз рехъ тагуз алакьна.

Эхирдай ада гьукумдин ва къанун-къайда хуьдай органриз, гьакIни жемиятдин тешкилатриз санал кIвалахунай сагърай лагьана.

Гьукуматдин Председателдин замес­ти­тель Рамазан Жафарова УФСИН-дин кIва­лах­дилай разивал къалурна.

— Россиядин ФСИН-дин Дагъустанда авай Управленидин коллектив хъсан пешекаррикай ибаратди ва зегьмет чIугваз кIандайди я. Алатнавай йисуз къанун-къайда хуьдай маса къурулушрихъ галаз­ санал абурулай гзаф крар, са гафуналди, вилик эцигнавай везифаяр кьилиз акъудиз алакьна. КIвалахда хъсан нети­жа хьун патал сих алакъада аваз санал зегьмет чIугунихъ тIимил важиблувал авач. Къейд авун лазим я хьи, Дагъус­тан­дин гьуку­матди УФСИН-дихъ галаз виликан­ йисарани­ виниз тир дережада аваз кIвалахар санал кьилиз акъудзавай, гилани а дережа хуьз ва мадни хъсанариз чалишмишвалзава. Алатай­ йисуз жуь­реба-жуьре министерствойрихъ ва ве­домствойрихъ, гьакIни муниципалитет­рихъ галаз санал дустагънавайбур кIва­лах­далди таъминарунин месэлай­рай са жерге серенжемар­ кьиле тухванва. Кьилди къачуртIа, къуватар­ сад авуналди,­ ча­лай «Каспийскдин­ стек­лово­локнодин­ завод» ва «Дагестан Стекло Тара» ООО-рин бинедаллаз дуьз рекьел ­ хкидай центраяр арадал гъиз алакьна­. Да­гъус­тандин Гьукуматдин Председатель А.Аб­­дулмуслимова ва УФСИН-дин регьбер А.По­лякова алай йисан 1-паюна, дус­тагъ­на­вай ксар зегьметдал желб авун яз, государстводин ва муниципалитетрин игьтияжар патал продукция гьасилдай заказар кьабулунин саналди тир пландал къулар чIугунва», — къейдна Р.Жафарова.

Гуьгъуьнлай коллегиядал къуллугъдин кьилдин хилерай важиблу месэлайриз килигна (тероргандин начальникдин заместителри жуьреба-жуьре хилерин гьаларикай малуматар гана) ва алай йисан планар (законлувал, къайда-низам мягькемарун,  дустагъра оперативный ва уьмуьр кьиле тухунин гьалар пайгардик кваз хьун таъминарун, анрай катунриз ва маса тахсиркарвилериз рехъ тагун  ва икI мад) веревирдна.

Рагнеда Рамалданова