Алай йисан 26-июлдиз, Дагъустан Республикадин Конституциядин йикъаз талукьарна, Усугъчай хуьруьн мярекатрин залда жемятдин иштираквал аваз концертдин программа ва армрестлингдай акъажунар кьиле фена.

Сифте гаф рахуналди, кьиле фейи мярекат Дагъустан Респубиликадин культурадин лайихлу работник Абдуллаев Бренбега ачухна, иштиракчийриз и югъ мубарак авурдалай кьулухъ, ада Дагъустан Республикадин Конституциядин йикъан тарихдикай куьруь малуматни гана.

Ахпа спортдин, жегьилрин сиясатдин ва туризмдин отделдин начальник Агъашериф Агъаширинов рахана. Ада Дагъустан Республикадин Конституциядин югъ вичин ва Докъузпара райондин Кьил Абдурагьим Алискерован патай мубаракна, чандин сагъвал рикIин шадвал хьун тIалабна.

Къейд ийин, и йикъаз талукьарна армрестлингдай акъажунар кьиле тухузвайдакай агьалияр виликамаз хабардарнавай. Турнирда райондин са шумуд хуьруьн жегьилри чпин гъилерин къуватар алцумна.

Кьилди къачуртlа, турнирда 1999-йисуз ва адалай кьилихъ йисара дидедиз хьайибуру иштиракна.

Къизгъин акъажунра агъадихъ галай спортсменри лайихлу чкаяр кьуна:

1-чка — Вадим Ханвердиев (ЦIийи-Каракуьре хуьр);                                                                                                      

2-чка — Эрик Шагьэмиров (Усугъчай хуьр);                                                                                                                   

3-чка — Сидредин Аладинов (ЦIийи-Каракуьре хуьр).

Гъалиб хьайи спортсменрин агалкьунар дипломралди ва пулдин пишкешралди къейдна.

«Лезги газет»