Дагъустандин хуьруьн майишатдин суьрсет гьасилзавайбуру, кутIуннавай икьраррин сергьятра аваз,  Россиядин маса регионрин базарар хъсандиз ­таъ­минарзава.  Жуьреба-жуьре регионрин арада авай стхавилин ала­къайрини и кардик вичин пай кутазва. ИкI, Ме­гьарамдхуьруьн ва Ленинградский областдин Тосненский районрин арада авай алакъайрикай фадлай малум я.

Картуфралди таъминарунин гьа­къин­дай кутIуннавай икьрардин­­ би­не­даллаз Мегьарамдхуьруьн райондин Къиличхан хуьруьн патав гвай хуьруьн ма­йи­шатдин производстводин “Гранит” кооперативдин чилерал алай вахтунда  фад дигмиш жедай ерилу “Импала” ва “Ред соня” сортарин картуфрин бегьер кIва­тIу­нин кIвалах кьиле физва.

Чна идалай виликни хабар гайивал, Мегьарамдхуьруьн райондин кьил Фарид Агьмедова Тосненский райондин кьил Виктор Захарова кьве райондин арада  кутIуннавай Икьрардин сергьятра аваз, хуьруьн майишатдин, спортдин, культурадин ва маса хилерай сих алакъаяр  та­йинарзава. РикIел хкин, стхавилин ала­къайрин гьакъиндай  документдал къулар 2016-йисан августдиз чIугу­най.

Районрин арада  хуьруьн майишатдин хилез, кьилди къачуртIа, Мегьарамдхуьруьн районда картуфар гьасилуниз ва суьрсет Россиядин базарра маса гуниз талукь проект уьмуьрдиз куьчуьрмишиз им пуд лагьай йис я.

Гьа са вахтунда картуфар цазвай майданар йисалай-суз гегьеншарзава. Майвачийри гьисабзавайвал,  алай йисуз 25 гектардай тахминан 350 тонн  бегьер вахчун планламишнава. Экологиядин жигьетдай михьи  суьрсетдин сифтегьан партия Ленинградский областдиз ва Москвадиз рекье твада.

Картуфрин бегьер  махсус техникадин куьмекдалди кIватIзава. Рабочийри  анжах никIин чилел чкIанвай картуфар  шешелра твазва.  Дагъустандин чилел виниз тир еридин картуфар гьасилунин  кIвалах кьиляй-кьилиз Тосненский райондин пешекаррин гуьзчивилик ква.

И райондин векил Петр Семкина къейдзавайвал, адан регьбервилик кваз исятда хуьруьн майишатдин суьрсет кIватIзава ва тайин чкайриз рекье твазва. Алай йисан бегьер булди хьанва. “Бегьердин ерилувал, гьелбетда, неинки гелкъуьнилай, гьакI накьвадин ерилувилелайни аслу я. Хъуьтуьл гьавади ва берекатлу чили лап хъсан бегьер арадал гъидай мумкинвал гузва”, — къейдзава пешекарди.

“Сифте нубатда заз  разивилин гафар Мегьарамдхуьруьн райондин кьил Фарид Агьмедоваз лугьуз кIан­зава. Ада райондин агропромышленный комплексдиз гузвай куьмек екеди я. Ам месэладин гъавурда дуьздаказ­ гьат таву­най­тIа, Ленинградский областдин фермервилин майишатдин ва “Гранит” кооперативдин  арада, къецепатан уьлквейрай гъизвай суьрсет чкадал гьасилзавайдалди эвезунин — тIуь­­низ ишлемишзавай картуфар битмишарунин рекье ийизвай кIвалахдин сергьятра аваз, къенин юкъуз  чими алакъаяр арадал атун мумкин кар жедачир”, — къейдна Петр Семкина.

16-июндилай  гъиле кьунвай бегьер кIватIунин кIвалах эхирдив агакьзава.  КiватIнавай бул бегьер  Россиядин маса регионрин шегьерризни рекье тваз гьазурзава. Фермерри къейдзавайвал, картуфрин  бегьерди, гьам кьадардал, гьам еридал гьалтайла, абурун  умудар кьилиз акъуднава.

Чи мухбир