Дагъустанда газдалди таъминарунин жигьетдай кардик квай программаяр менфятлудаказ кьилиз акъудунин нетижада 5 агъзурдалай виниз кIвалериз газ тухудай мумкинвал хьана. «Газпром межрегионгаз Махачкала» компаниядин пресс-къуллугъди хабар гузвайвал, и жигьетдай кIвалах РД-дин гьукуматдихъ галаз санал виликамаз гьазурнавай махсус пландин бинедаллаз тешкилнава.
РикIел хкин, республикада кардик квай «Догазификация» программадин куьмекдалди газдин турба кIвалер алай чилин участокдин часпардив кьван пулсуз тухузва. И дуьшуьшда герекди кIвалин ва участокдин документар къайдадик хьун я. Идалайни гъейри, газдин турба кIвалин патав кьван тухун ва и карда виже къвезвай затIар маса къачун патал яшайишдин субсидия чара ийизва.
«Газпром межрегионгаз Махачкала» компаниядин регьбер Ризван Мурадован гафаралди, субсидиядин кьадар 100 агъзур манатдив кьван агакьзава. «Догазификация» программада иштиракун патал МФЦ-дин къуллугърикай менфят къачуз жеда.
«Лезги газет»
