17-февралдиз Каспийскда, Республикадин образованидин центрада, «Лезги газетдин» редакцияди лезги чIалай Махачкъала ва Каспийск шегьеррин мектебра 6-классра кIелзавай аялрин арада олимпиада тухуда. ЦIи ирид лагьай сеферда тешкилзавай и мярекат Дагъустандин халкьдин шаир СтIал Сулейманан 155 йис тамам хьуниз бахшнава.
Газетдин кьилин редактор Мегьамед Ибрагьимова къейд авурвал, олимпиада XX асирдин Гомеран юбилейдин сергьятра аваз кьиле тухузвайвиляй цIи пулдин пишкешрин ва гъалибчийриз гудай чкайрин кьадар артухарнава. Идалайни гъейри, пулдин пишкешриз сифтегьан 5 чка кьур аялрин муаллимарни лайихлу жеда.
Къейд ийин хьи, олимпиада кьиле тухунин кьилин макьсад шегьеррин мектебра кIелзавай аялрин арада хайи чIалахъ авай кIанивал артухарун ва, абурун арадай алакьунар авайбур винел акъудна, руьгь кутун я.
Чи мухбир
