Дагъустанда Сергей Меликован тапшуругъдалди, хатасузвилин къайдайрал амал тавуна, газ тухванвай кIвалер, майишатар винел акъудунин жигьетдай кIвалах давам жезва.
«Газпром межрегионгаз Махачкала» ООО-дин делилралди, ахтармишунрин нетижада, тек са республикадин меркезда кIвалериз газ тухудайла, къанунрал амал тавунвай 532 дуьшуьш винел акъуднава, 1022 дуьшуьшда сертифицировать (талукь идарайри ишлемишдай ихтиярар гун) тавунвай газдин алатрикай менфят къачузвай.
Къейд ийин хьи, къенин йикъалди Госжилинспекциядин, МЧС-дин, къанун-къайда хуьдай органрин ва газдин къуллугърин векилрикай ибарат дестейри 6 агъзурдалай виниз кIвалера ахтармишунар кьиле тухванва. «Газпром межрегионгаз Махачкала» ООО-дин генеральный директор Ризван Мурадован гафаралди, ахтармишунрин кьилин макьсад неинки къанунсузвилер арадай акъудун, гьакIни агьалийрин арада хатасузвилин къайдайрал амал авунин жигьетдай таблигъат тухун, абуруз кIвалер, чилин участокар хсусият яз регистрация авунин карда куьмекар гун я.
Гьайиф хьи, Дагъустанда газдилай зегьерламиш жезвай, хъиткьинунар арадал атана, инсанар телеф жезвай дуьшуьшар давам жезва. 6-февралдиз Дербент райондин Великент хуьре, газдин къайдадик квачир пич себеб яз, кьве кас — пабни итим — зегьерламиш хьана. Нетижада паб телеф хьана, итим духтурханадиз агакьарна. И дуьшуьшдиз талукь яз прокуратуради ахтармишунар тухузва.
Чи мухбир
