Алава медидараяр

РД-дин здравоохраненидин министерстводин телеграм-каналди хабар гузвайвал, Дагъустандин меркездин кьве посолекда типовый цIийи поликлиникаяр ачух хьанва. Шегьерда эхиримжи 15 йисан къене сифте яз эцигнавай медицинадин и дараматра мукьвара сифтегьан пациентар кьубулуниз гьазурвал аквазва. Чешмеди кхьизвайвал, анра шегьердин 8-нумрадин чIехибурун поликлиникадин ва 3-нумрадин аялрин поликлиникадин филиалри кIвалахда.

Ведомстводин делилралди, винидихъ къалурнавай медидарайрин виликан базайрини чпин кIвалах акъвазардач, абуру агьалияр кьабулун давамарда. Чешмеди къейдзавайвал, шегьердин мукьув гвай поселокра яшамиш жезвай ксариз, чпин кIвалериз мукьва идарайриз атана, медицинадин куьмек къачун, диагностика кьиле тухун, сагъламвал мягькемар хъувун хейлин регьят акъвазда.

Телеграм-каналда кхьизвайвал, 8-нумрадин поликлиникадин куьгьне­ да­­­­рамат капитальнидаказ туькIуьр хъу­­­­­­вунин месэлани веревирдзава­. Къейдзавайвал, асул гьисабдай и да­ра­мат кьадайвал туьхкIуьр хъувунва (яни тайин­ тир макьсадар патал) ам медидара хьиз ишлемишунин кардив хъсандаказ кьунвай чка туш.

Шегьердин 8-нумрадин поликлиникадин цIийи дараматда лагьайтIа, алай вахтунда эндоскопический къуллугъ кардик ква, мукьвара ина флюорографни маммограф эцигда.

Чешмеди кхьизвайвал, участковый­ духтурри ва квалификация авай са жерге пешекарри агьалияр гьам поли­кли­ни­кайрин сифтегьан адресра­, гьамни цIийи дараматра кьабулда. Агьалий­риз гьакIни лабораториядин ва алат­рин диагностика­ ийидай мумкинвални жеда. ГьакIни 2024-йисуз и поликлиникаяр алай девирдин медицинадин техникадалди тадаракламишунин кIвалах давамар хъувунни пландик кутунва.

8-нумрадин поликлиникадин адресар: Абдулхаким Юсупован куьче, 14. Телефонрин нумраяр: +7 (8722) 60-38-84, 60-02-61. Ленинкент поселок, Сов­хозная куьче, 10. Телефонрин нумраяр:­ +7 (8722) 51-00-18, 51-00-19.

3-нумрадин аялрин поликлиника­дин­ адресар: Имам Шамилан тIвару­нихъ­ галай проспект, 8. Сепараторный поселок, Перован куьче, 23. Телефонрин нумраяр: +7(8722) 56-26-76, 63-19-40.

Мягькем чка кьазва

РД-дин хуьруьн майишатдин ва не­дай суьрсетдин министерстводин­ те­лег­рам-каналди къейдзавайвал, алай вахтунда Россияни Египет, помидорар гьасилунал гьалтайла, кIвен­кIвечи уьл­квей­рин сиягьда ава.

Чешмеди кхьизвайвал, и майвайрин базарда Дагъустандини мягькем чка кьазва.

ИкI, ведомстводин делилралди, рес­­публикада гьар йисуз саки 1,5 миллион тонн салан майваяр кIватI хъийиз­ва, абурукай саки кьудан са пай помидоррал ацалтзава. Абур цазвай май­данарни йисалай-суз артух жезва.

Дагъустандин теплицайра гьасил­за­­­­вай жегьре рангунин помидорри еке маш­гьурвал къазанмишнава. Чешмеди­ къейдзавайвал, кьилди къачуртIа, рес­пуб­­ликада кIевирнавай накьвада гьар йисуз 75 агъзур тонн салан майваяр гьа­силзава, абурукай чIехи пай помидорар я.

Кар алай рекъемар

Мукьвара РД-дин гьукуматдин пред­­­седателдин сад лагьай замес­ти­тель Манвел Мажонцан регьберви­лик квай делегация Махачкъаладин­ энергетикадин объектар туькIуьр хъийиз­вай къайдадиз килигна. Идакай­ респуб­ли­кадин энергетикадин ва тарифрин министерстводин телеграм-каналда ха­бар гузва.

Чешмеди делегация объектрихъ га­лаз таниш хьунин сергьятра аваз раиж авур кар алай къейдер чапнава. Абурукай бязи рекъемар чна газет кIелзавайбурун фикирдиз гъизва.

Энергиядалди таъминардай къурулушар цIийи кьилелай туькIуьр хъувуниз талукь еке серенжемар кьиле тухунин сергьятра аваз 142 подстанциядиз цIийи тадаракар къачунва ва меркездин 22 фидердал цIийи техника эцигунин кIвалахар кьиле тухузва.

«ДОСААФ» подстанциядал 1000 кВА-дин чкадал 1250 кВА-дин гужлувал авай цIийи техникади кIвалахда. И районда яшамиш жезвай агъзурралди инсанар электроэнергиядалди таъминарунин ери хъсан жеда.

«Дагестанская» подстанциядал куьгь­­не са трансформатор цIийи кьве трансформатордалди дегишарнава, абу­рун гужлувал 630 кВА-дикай ибарат я.

124 километрда еке вольтдин ка­белдин линияр дегишарнава, кIвала­хар 80 процентдин кьилиз акъуднава. Бетондин 452 даях дегишарунин кIва­лахрин — 85 процент.

Дагэнергоди кIвалахар 25 февралдалди акьалтIарун хиве кьунва. Къейд авун лазим я хьи, 2024-2025-йисара ибурулай гъвечIи тушир кIвалахар тамамарунни вилик акъвазнава.

Шегьердин четин участокра­ ­алава­ яз 68 БКТП-яр (блоч­ные­ ком­плектные ­трансформаторные подстанции)­ эцигун пландик кутун­ва­.

Махачкъалада электросетдин ма­йи­шатда реконструкция кьиле тухуни агьалияр патал эцигзавай тарифриз таъсирдач.

Къулай хьун патал

Агъачаул хуьруьн агьалийрин тIа­лабуналди РД-дин транспортдин ва рекьерин майишатдин министерстводи а хуьруьз физ-хкведай улакьдин маршрут дегишарнава. Идакай ве­домстводин телеграм-каналда хабар гузва.

ИкI, улакьдин рехъ Агъачаулдин мек­тебдилай башламиш жезва, Гьами­дован тIварцIихъ галай проспект­дин­  40-нумрадал – Имам Шамилан тIвар­цIихъ галай проспектдин пипIел кьван къвезва. Рекье тайинарнавай акъвазардай чкайрал агьалийривай автобусдай эви­чIиз ва адаз  акьахиз жезва.

Чешмеди кхьизвайвал, маршрутда гъвечIи классдин 4 автобусди экуьнин сятдин 7-далай нянин сятдин 8-далди­ къуллугъзава. Экуьнин ва нянин улакьрин гьерекат лап гзаф жедай вахтара автобусри арада зур сят аваз кIвалахзава. Рекьин гьакъи 35 манат я.

Гьазурайди – Муса  Агьмедов