И йикъара чав рикI тIардай чIулав хабар агакьна: 75 йисан яшда аваз, бейхабардиз галукьай залан азардикди чи дуст, хъсан меценат, карчи, лайихлу тешкилатчи, жегьилрин насигьатчи, зегьметдин ветеран Суьгьбет Хуршидович Хуршидов рагьметдиз фена.
Залум ажалди чаз, адан дустариз, хизанризни мукьва-кьилийриз, вири фийивийриз ясдин йикъар ва чIулав либасар багъишна. Чна сада-садаз башсагълугъар рекье твазва, хизанриз сабурар гузва.
С.Х.Хуршидов 1949-йисан февралдиз Ахцегь райондин Фиярин хуьре дидедиз хьана. Ахцегьа юкьван школа, Махачкъалада ДГУ-дин инженервилинни эцигунрин факультет акьалтIарайдалай кьулухъ ада меркездин яшайишдин кIвалера къулайвилер тунин управленида кIвалахна, ина ам гьа управленидин начальникдин къуллугъдал кьван хкаж хьана.
Вичин алакьунралди, везифайрив эгечIунин тегьерралди, чирвилералди чIехи шегьердин яшайишдин лап четин хиле неинки руководстводин, сифте нубатда гьакI шегьерэгьлийрин патай чIехи гьуьрмет ва авторитет къазанмишна. Гьавиляй ам жуьреба-жуьре йисара гзаф сеферра Ленинский, Советский районрин, Махачкъала шегьердин советрин, гуьгъуьнлай собранийрин депутатвиле хкяна.
Пенсиядиз экъечIайдалай кьулухъ ада чи республикадин ДОСААФ-дин къурулушда кIвалахна. Жегьилар Ватандиз паквилелди къуллугъиз гьазурунал машгъул хьана. Вишералди лап хъсан пешекарар (шоферар, радистар, авиаторар, техникар) чи армиядин жергейриз рекье туна.
С.Х.Хуршидован зегьмет государстводин ва ведомствойрин чIехи шабагьар гуналди къейдна. Меркезда важиблу са мярекатни ам галачиз кьиле фидачир.
Ветеранди чIехи хизанни арадал гъана. Адан веледри республикадин яшайишдинни экономикадин, законар хуьнин къурулушра бубадин рехъ давамарзава.
Вучда кьван, чилел атай кьван инсанар са вахтундилай эбеди дуьньядиз хъфинни ийида…
Чна Суьгьбет Хуршидовичан хизанриз, мукьва-кьилийриз, вири багърийриз башсагълугъвал гузва. Адан экуь къамат чи рикIелай садрани алатдач.
