Алатай гьафтеда Ахцегь райондин медениятдин кIвалин кIелдайбурун залда общественный палатадин (ОП) нубатдин заседание адан председатель Шемсидин Арухова ачухна. Адан кIвалахда муниципалитетдин кьилин заместитель Роберт Гьамзаева ва теклифнавай маса ксари иштиракна.
Общественный палатадин членрив шагьадатнамаяр вахкайдалай ва йикъан месэлаяр раиж авурдалай кьулухъ гаф райондин хуьруьн майишатдин управленидин (УСХ) начальник Алик Давудоваз гана. Ада районда багъманчивал авай гьалдикай ва хуьруьн майишатдин и хел вилик тухунин, иллаки фад ва хъсан бегьер гудай багълар артмишунин мумкинвилерикай доклад авуна.
Доклад веревирд авуналди, районэгьлийрин яшайишдин метлебдин и месэладай чпин фикирар райондин общественный палатадин членар тир дяведин ветеранрин советдин председатель Нажмудин Гудаева, Агьмед Дагъларова, Эминат Вагъуфовади ва масабуру лагьана. Кьилди къачуртIа, абуру районда емишар гьялдай цех кардик кутунин, емишар хуьдай гьамбархана эцигунин, Ахцегьа, гьакI Дербент, Махачкъала шегьерра емишар маса гудай кьилдин чкаяр, туьквенар ачухунин теклифар гана.
«Районэгьлийриз чпин зегьметдин нетижа-хийир аквадай, багъманчивилел гьевесламиш жедай хьтин хъсан шартIар тахьанмаз, багъманчивал арадал хкиз жедач…», – къейдна абуру. Роберт Гьамзаева залда авайбур районда багъманчивилин виликан машгьурвал арадал хкун патал райадминистрацияди ийизвай кIвалахдикай хабардарна.
Йикъан кьвед лагьай месэладай – КЦСОН-дин коллективди чкайрал набутризни игьтияж авай ксариз куьмекунин кIвалахрикай доклад и идарадин директордин заместитель Фатима Мурсаловади авуна.
3-месэла – райондин «Ахцагь» стадион Къеземетов Мирзе Къеземетовичан тIварцIихъ ягъун – иллаки итижлуди хьана. Вучиз лагьайтIа, футболдин гьевескарри стадион М.Къ.Къеземетован ваъ, гуя ам футболист тушир, са машгьур футболистдин тIварцIихъ ягъунин патахъай къулар кIватIнавай. Абуруз Мирзе Къеземетов гьеле Ватандин ЧIехи дяведин четин йисара районда спортдин вири хилерай бине кутур зурба кас тирди чизвачир. Къейд ийин хьи, къад йисан вахтунда райондин спорткомитетдин председатель хьайи ада, физкультурадинни спортдин рекьяй СССР-дин Министррин Советдин Вирисоюздин комитетдин отличникди, гьакI Дагъустанда залан атлетикадай пагьливанрин акъажунринни конкурсрин гъалибчиди, республикада сифте яз Ахцегьа штангадин секция ачухна. Эхь, Ахцегьа урусрин къеледин патав вичин хушуналди ва харжийрихъ сифте стадион туькIуьрайдини, Россияда 1-чкаяр кьур штангистар, цIудралди спортдин разрядникарни мастерар гьазурайдини гьа кас я. Адан девирда Ахцегь район спортдин вири жуьрейрай республикада сифте чкадал алай. Гьаниз килигна, райондиз ДАССР-дин Министррин Советдин гъиляй-гъилиз къведай Яру пайдах ганай. 1941-1948-йисара Ахцегь районда ва адалай къецени пагьливанрин арада акъажунрин махсус мярекатар тешкилиз (майданрал пагьливан яз сифтени-сифте вич экъечIзавай), къазанмишай 70 агъзур манатдилай артух пул ада Советрин Армиядиз куьмекунин фондуниз янай. Ихьтин ватанпересвиляй Мирзе Къеземетован тIварцIел И.В.Сталина вичин къул, муьгьуьр алай Чухсагъулдин чар рахкурнай. Алай вахтунда и документар Ахцегьрин музейда ачухнавай адан хсуси экспозицияда хуьзва…
«Ахцагь» футболдин майдан Мирзе Къеземетован тIварунихъ ягъунин теклифдин тереф хуьзвай келимаяр Наргиз Мукаиловади, Ахцегьрин музейдин директор Агьмед Дагъларова, и цIарарин авторди ва масабуруни лагьана. Рейсадвилелди сесер гуналди, «Ахцагь» стадион районда спортдин бине кутур машгьур пагьливан Мирзе Къеземетовичан тIварцIихъ ягъунин къарар кьабулна.
Общественный палатадин цIинин йисан сифте заседание алатай йисан кIвалахдин нетижаяр кьуналди ва 2024-йисан кIвалахдин план тестикьаруналди акьалтIна.
Дашдемир Шерифалиев
