Алукьнавай йисуз винидихъ чпикай лагьанвай вири конкурсар къуватда амукьда. Идалайни гъейри, абурал мад са конкурс алава хъжеда. Сифте чун «Йисан месэладикай» рахан.
2023-йисан 22-ноябрдиз РФ-дин Президент Владимир Путина кьабулай къарардалди алукьнавай 2024-йис Хизандин йис яз малумарнава. И месэла майдандиз акъудунин бинеда государстводи хизан хуьнин кардиз ийизвай итиж къейдзава. КьетIен фикир хизандин адетдин ивирар — кIанивал, вафалувал, гьуьрмет, сад-садан гъавурда гьатун, куьмек гун, чIехи-гъвечIи чир хьун, диде-бубадиз гьуьрмет авун, хизанда гзаф аялар хьун – хуьниз гузва. Ибур мягькем ва бахтлу хизандин бинеяр я, мягькем хизан лагьайтIа, — жемиятдин бине.
«Лезги газетдин» «Йисан месэла» конкурсни хизандин месэлайриз талукьди я. Пуд чкадикай ибарат тир и конкурсдин премийрин кьадар виликдай хьиз амукьда: 3000, 2000 ва 1000 манат. Амма инлай кьулухъ макъалайрин жанрайриз фикир гудач, кьилинди итижлу ва марагълу эсер кхьин я. Текстинин кьадар 4 чарчелай артух ва шииррин кьадар 5 бендинилай тIимил тахьун лазим я.
«СтIал СУЛЕЙМАН – 155 йис». Малум тирвал, 2024-йис неинки лезги халкьдин зурба шаир, гьакIни Дагъустандин шииратдин нурлу гъетерикай сад, ажайиб алакьунар ва бажарагъ себеб яз, вичиз «XX асирдин Гомер» лагьай тIвар ганвай, Халкьдин шаир лагьай дережадиз хкаж хьайи СтIал Сулейманан 155 йисан юбилейдиз талукьарнава. РД-дин Кьил Сергей Меликован къарардалди зурба шаирдин юбилейдин йис республикада гегьеншдаказ къейддайвал я. Гьаниз килигна, «Лезги газетдин» редколлегияди алай йис патал мад са конкурс малумарзава: СтIал Сулейманан яратмишунриз, уьмуьрдин рекьиз, ада тунвай ирсиниз талукьди. Конкурсдин шартIар чна сергьятламишнавач: жанрайрин, гьакIни авторрин яшариз талукь азадвилер хвенва. Фикир гудай кьилин терефар: итижлувал, эсерлувал. Премия – 8000 манат.
Юмординни сатирадин куьруь жанрайрин «ИкIни жеда кьван!» ва уьмуьрдин рехнеяр арадай акъудиз куьмек гузвай «Хъсан шикил» конкурсарни давамарзава. И конкурсра гъалиб хьайибуруз гьардаз 1000 манат премия ва дипломар гуда. «Хъсан шикил» конкурсда иштиракун патал художникдин тегьерда гуьзел шикил чIугун герек туш, кIанзавайди гьар сана, гьар камуна аквазвай нукьсанар, къайдадик квачир, фикир желбна, туьхкIуьрна кIанзавай чкаяр, гьич тахьайтIа, телефондай шикил яна, редакциядиз рекье тун я. Гьатта текстни чарасуз туш, чкадин тIвар кхьин ва нукьсандиз талукь куьруь делилар агакьарун важиблу я.
«Гьевесламишдай премия» — 1000 манат ва диплом. Ам чна са шумуд касдиз гузвай дуьшуьшар тIимил туш. И кар патал газетдин чинал гьар жуьредин хци месэлайрай макъалаяр гъана кIанда.
«Йисан мухбир» конкурс — 3000 манат. И премиядалди «Лезги газетди» виридалайни активнидаказ кхьизвай, гьар жуьредин месэлаяр къарагъарзавай, абурал фикир желбзавай мухбиррин зегьмет къейдзава.
Жаванрин ва жегьилрин арада бажарагълубур хкягъунин мураддалди малумарнавай «Литературадин эсеррин конкурсдин» пуд премияни къуватда ама.
Сад лагьайди — виридалайни хъсан гьикаядин эсер. И конкурсда чпин яшар 35 йисалай виниз туширбурувай иштиракиз жеда. Кьвед лагьайди – республикадин студентрин арада «Виридалайни хъсан очерк» кхьинай. Пуд лагьайди — мектебра кIелзавай аялрин арада «Виридалайни хъсан шиир» кхьинай. Темаяр ачухбур я.
Конкурсрин гъалибчийрин агалкьунар пулдин премийралди (1-чка – 3000 манат, 2-чка – 2000 манат ва 3-чка – 1000 манат) ва «Лезги газетдин» дипломралди лишанламишда.
Буюр, кхьихь. Газетдин редакциядихъ галаз алакъа хуьх. Агалкьунар хьурай!
Жасмина Саидова
