Конкурсрин нетижаяр

13-январдиз Россияда  Печатдин югъ — журналистрин, редакторрин, корректоррин,  писателрин, типографийрин  рабочийрин, ктабар акъудзавайбурун  пешекар сувар къейдна. Адет тирвал, цIийи  йисан сифте йикъарал гьалтзавай и  суварин вилик  яратмишунин хиле кIвалахзавайбур патал малумарай конкурсрин нетижаяр кьазва.  ИкI, и йикъара  «Лезги газетдин» редакциядани 2023-йис патал малумарай конкурсрин гъалибчияр хкяна. Мубаракрай агалкьунар!

Конкурсрин гъалибчияр

Гьажибег Гьажибегован премия — 10 000 манат.   «Лезги газетдин»  (а чIавуз – «ЦIийи дуьнья») сад лагьай редактор, журналист, драматург, критик, литературовед, латин графикадин бинедаллаз лезги ва табасаран чIаларин алфавит туькIуьрай алим, Дагъустанда  педагогикадин илимрин сад лагьай  кандидат,  умуми образованидин мектебар патал хайи чIалай ва литературадай гьазурнавай  гзаф кьадар ктабрин автор – Дагъустандин илимдин ва культурадин  къизилдин фондуна гьатнавай яратмишунрин ирс тунвай Гьажибег Агьмедханович Гьажибегован (1902-1941) тIварунихъ галай и  премия  милли журналистика, литература, илим вилик тухунин кардик лайих­лу пай кутур ксариз гузва.

Ихьтин ксарикай сад редколлегиядин къарардалди алай йисуз и премиядиз ла­йих­лу хьанвай филологиядин илимрин кандидат, шаир, публицист, таржумачи ва педагог Азиз Мирзебегов я. Лезги  эдебиятдин векилрикай кхьизвай, абурун уьмуьрдин ва яратмишунрин рекьер ахтармишунин кIвалах тухузвай, ктабар акъудзавай, яни лезги литературадин ва публицистикадин ирс хуьник  виле акьадай  пай кутазвай  А.Мирзебегован публицистикадин макъа­лаяр «Лезги газет» кIелзавайбуруз фадлай­ таниш я. Кьилди  къачуртIа, мисал яз, алатай йисан 27-нумрадин газетда сад лагьай пай чапнавай ва зурба писатель Шагь-Эмир Мурадован юбилейдиз талукь «Шалбуз дагъдин авазри лувар кутазва», гьакIни Абдул Фетягьан яратмишунриз талукьарнавай  макъалаяр гъиз жеда.  Азиз Мирзебеговаз,  гъиле кьунвай месэладив мукьуфдивди, дериндай ва фагьумлувилелди эгечIун, яратмишунриз къимет гудайла, вичи лугьузвайвал, «къелемэгьлиди уьмуьр кьиле тухвай девирдин, тарихдин гьалар фикирда кьун»  хас я. Им лагьайтIа, терефкарвал тавунин важиблу бине я.

Мегьамед Гьажиеван премия – 5000 манат.  Лезги халкьдин  машгьур лингвист, филологиядин илимрин доктор, кавказовед,­ РАН-дин ДНЦ-дин ИЯЛИ-дин бине кутур алимрикай сад (адаз кьуд чIал — азербайжан, табасаран, урус ва араб —  хъсандаказ чидай), хайи лезги чIал ахтармишунин, адал гзаф йисара мукьуфдивди кIвалахунин нетижа яз, чи халкь патал вичин метлеб сад­рани квахь тийидай ва вичиз тешпигь авачир урус чIаланни лезги чIалан таржумадинни баянрин (переводно-толковый) зурба  словарь (35 агъзур гафуниз баянар ганва)  гьазурай  Мегьамед Мегьамедович  Гьажие­ван (1897-1958) тIварунихъ галай премия  лезги чIал хуьник, чируник, ахтармишуник, ам девлетлу авуник  пай  кутурбуруз гузва.

2023-йисан нетижайралди, М.Гьажиеван премия шаир ва таржумачи, литературадин критик Арбен Къардашаз гун кьетIна. Арбен Къардаша неинки лезги эдебиятдин­ ирс, тарих кIватIунин, гьакIни ам гегьенш майданра раиж авунин рекье ийизвай кIва­лах екеди, важиблуди тирди, заз чиз, тикра­рунин лазимвал авач. Вичин яратмишунра ада  гьар  жуьредин  жанраяр  ишлемиш­­за­ва, гьа жергедай яз, рикIел хкунрин,  яни ­мемуаррин стиль (Р.Гьамзатовакай кхьен­вай «Шаирдихъ галаз санал» макъала, 35-нумра).

«Йисан месэла» конкурсдин пуд  премия

2008-йисалай инихъ алукьзавай гьар цIийи йис РФ-дин Президент Владимир Путина и ва я маса месэладихъ, йикъахъ, вакъиадихъ галаз  алакъалу ийизва. И кардин метлеб къейднавай месэладал жемиятдин кьетIен фикир желб авун, ам бинедилай ахтармишун, агьалийрин зигьиндив адан важиблувал  агакьарун я. ИкI, РФ-дин Президентдин къарардалди 2023-йис Россияда муаллимдин ва  дуьз рекье твадай тербиячидин (наставник) йис яз малумарнавай. И къарардин бинеда  муаллимдин пешедин важиблувал къейд авун, ам виниз тир дережадиз акъудун ава.

ИкI, «Лезги газетдин» редакцияди, адет хьанвайвал, пуд премиядикай ибарат тир  «Йисан месэла: образование» конкурс малумарнай.

1-премия — очерк —  3000 манат.  И конкурсда  «Лезги газет» кIелзавайбуруз фадлай таниш мухбир, гьа са вахтунда СтIал Сулейманан райондин «Куьредин хабарар»­ газетдин журналист, шаир Хазран Кьасу­мов гъалиб хьанва. Образованидин, насигьатчивилин, тербиядин месэлайриз талукьарнавай адан макъалайриз газет кIелза­вайбурун патай  еке итиж ава.

2-премия  — публицистикадин макъала — 2000 манат. 2023-йисан нетижайралди и премиядиз  датIана тербиядин месэлайрай кхьизвай, кьилди къачуртIа, хизанда диде-бубайрин ва аялрин арада алакъай­риз, алай четин девирдин вахтунда аялар дуьз тербияламишуниз кьетIен фикир гузвай, са акьван кваз кьан тийизвай и мес­элайрин важиблувал рикIелай ракъур тавунал фикир желбзавай автор, Ахцегь райондай тир  журналист Нариман Мамедов лайихлу хьанва.

3-премия  — шиир — 1000 манат. И премия, адет яз, йисан месэладиз талукьарна,­ шиир кхьей ксариз гузва. Конкурсдин истемишунриз жаваб гудай шиирар агакь тийиз­ им кьвед лагьай йис я, талукь яз, гъалибчидин чкани ачух яз ама. Гьаниз килигна,­ инлай кьулухъ редколлегияди премия къуватда тун, амма адан шартI дегишарун кьетIнава: инлай кьулухъ пуд лагьай премияни макъаладай гуда.

«ИкIни жеда кьван!» — 1000 манат.  2023-йисуз конкурсдин гъалибчи штулви Сабир Эфендиев хьана. Адан сатирадин жуьреда кхьенвай  «Туьтуьнин хат», «Гзаф-тIимил», «Фикирзавайбур», «КварквацIар», «Дарман» ва са жерге маса юморескаяр,  мезелияр газет кIелзавайбурувай, кьилди къачуртIа, «Лезги газетдин» 49 ва 52-нумрайрай кIелиз жеда.

«Гьевеслу ийидай премия» — 1000 манат ва диплом. Ихьтин конкурс кардик кутунин макьсад жегьил несилар, гьакIни цIийи авторар хайи чIалал, литературадал ва пуб­лицистикадал желб авун, абурун арадай бажарагълубур тайинарун я. Алатай йисан­ нетижайралди ва редколлегиядин къарардалди и премиядиз кьве автор лайихлу хьанва:

Мукаил Агьмедов – Мегьарамдхуьруьн райондин Бут-Къазмайрин школадин муаллим, писатель, хайи халкьдин тIал алай месэлайрикай,  тарихдикай,  культурадин ирсиникай марагълу макъалаяр  кхьизвай автор.

Гьажиагъа Мегьамедшерифов – жур­налист ва шаир, публицист ва тарих­чи, Дербент шегьерда ракьун рекьерин­ музей арадал гъайи кас, «Семафор» газетдин­ кьилин­ ре­дактор. «Лезги­ газет»  кIел­завайбуруз Гь.Ме­­гьамедше­ри­фован яратмишунар гьакI­­­­ни «Араблинский» тахаллус­дик кваз та­ниш я.

«Хъсан шикил» кон­курс – 1000 манат.­ И премиядалди чаз «Лезги га­зетдин» мухбир,­ публицист­, хайи ерий­ри­кай пеше­кар­­ви­лелди­ кхьей са шумуд макъа­ладин­ автор Руслан­ Керимханован­ «Ги­ли­­ви­яр къени чеб чпел хквезвач» макъала­дихъ (37-нумра, 5-чин) галай Гилийрин клубдин шикилар къейд ийиз­ кIанзава.

Литературадин эсеррин конкурс – 3000, 2000, 1000 манат. Эхиримжи йисара  кардик кутур и конкурсдин макьсад  жегьилар (мектебра кIелзавай аялар, студентар) эдебиятдин, публицистикадин рекьел  желб авун  я.

1-премия – 3000 манат  виридалайни хъсан гьикаядин эсердай гузва. Гьайиф хьи, и премиядин истемишунриз жаваб гузвай эсер чав агакьнач. Гьаниз килигна, гъалибчидин чка ачухди яз ама.

2-премия – 2000 манат очеркдин автордиз гузва. И сеферда  премиядиз ДГУ-дин филологиядин факультетдин РДО-дин студентка Милана Хидировадин хайи хуьруьн – Мегьарамдхуьруьн райондин Кркарин – тарихдикай, кьилди къачуртIа, хуьре савадлувилин месэла гьялунин рекье къачур камарикай кхьенвай макъала лайихлу хьанва.

3-премия – 1000 манат – темадилай­ аслу тушиз, виридалайни хъсан шиир кхьей  жегьилриз гузва. И рекье гъалибвал Ма­дина Эмирчубановади – ЦIийи Къара-Куь­редин мектебдин 7-классдин ученицади  къазанмишнава.

«Йисан мухбир» премия – 3000 ма­нат. Редколлегиядин къарардалди, 2023-йисан­ нетижайралди премиядиз «Лезги газетдин»­ экономикадин отделдин редактор (и цIа­рарин автор) Жасмина Саидова ла­йих­лу хьанва.

Конкурсра гъалиб хьанвай, гьакIни газетдин редакциядихъ галаз сих алакъа хуьзвай вири  юлдашриз  редакциядин коллективди  агалкьунар рикIин сидкьидай теб­рикзава. Къуй куь къелемар мадни хци хьурай! Премиярни дипломар, редакциядиз мугьман хьайила, вахчуз жеда.

Жасмина Саидова