СтIал Сулейманан райондин спортдин, туризмдин ва жегьилрин крарин рекьяй комитетди 2023-йисан кIвалахдин нетижаяр кьуна. Идакай чаз райондин пресс-къуллугъди хабар гана.
РУО-дин ва культурадин отделдин куьмекни галаз тешкилнавай и мярекатдал кIватI хьанвайбуруз райадминистрациядин кьилин 1-заместитель Лацис Оружева алукьнавай цIийи йис мубаракна, виридахъ чандин мягькем сагъвал ва спортдин рекье мадни кьакьан кукIушар муьтIуьгъардай къуватар хьун алхишна, райондин администрация спорт вилик тухунихъ ва активный уьмуьр кечирмишун машгьурунихъ элкъуьрнавай серенжемра куьмекар гуз гьамиша гьазур тирди къейдна.
Жаванрихъ ва залда кIватI хьанвай спортсменрихъ элкъвена, насигьатдин келимаяр спортдин, туризмдин ва жегьилрин крарин рекьяй комитетдин директор Чингиз Абдулмежидова, райондин образованидин управленидин начальник Гьуьсейн Шихбабаева ва кьилин мискIиндин имам, грэпплингдай дуьньядин чемпион Шамил Рагьманова лагьана. Боксдай дуьньядин ва Европадин чемпион Альберт Селимова ва азаддаказ кьуршахар кьунай дуьньядин чемпион Шамил Мамедова жаван спортсменрив видеоалакъадин куьмекдалди чими келимаяр агакьарнавай.
Шад мярекатдин сергьятра аваз, йисан вахтунда хъсан нетижаяр къазанмишай тренеррин-муаллимрин ва спортсменрин алакьунар хьиз, кIелунинни тербиядин, насигьатчивилин рекьерай ва гуьгьуьллудаказ хъсан крарал машгъул ксарин кIвалахни къейдна.
Рагнеда Рамалданова
